Кажне еҥ ты пагытым шке семынже ужеш да акла. Йошкар-Оласе 80-ше номеран «Ӱжара» йочасадыш коштшо икшыве-влак (снимкыште) тыге шонат.
Арина НИКОЛАЕВА: «Шыже – шӧртньӧ тӱсан, поян пагыт. Шке лектышыж дене калыкым куандара. Кеҥеж гоч тыршымышт арам лийын огыл».
Ева МАРКОВА: «Шыже поҥган, олман да тамле. Мый авам дене пырля чодырашке кошташ йӧратем. Шыжым лышташ-влак тӱрлӧ тӱсан улыт».
Вика КОСТРОМИНА: «Шыже мотор, чевер. Пуйто сӱретче тӱрлӧ тӱсан чия дене чиялтен. Нимогай йӱрат мушкын колтен огеш керт».
Ангелина КРАШЕНИННИКОВА: «Мый шыжым чевер тӱсаным ужам. Корно воктене кушшо пызле-влак торашке тулла койын волгалтыт».
Алиса ХАЛЬЗОВА: «Лышташ-влак мландымбаке шыман велыт. Нуно нарынче тӱсан улыт. Мланде нарынче тӱсан тӧшак гай коеш».
Надежда ГОДУНОВА мутланен.
Авторын фотожо.
