Йошкар-Оласе школлаште марий ӱдыр-рвезе-влак шукын тунемыт. Марий конкурслаште чолгалыкыштым чыланжак огыт ончыкто. Теве Т.В.Иштрикова лӱмеш «Синяя птица» гимназийыште 1-ше «А» классым тунем пытарыше Ксения Эманова (снимкыште) сценышке лекташ моткоч йӧрата.
Ӱдыр, гимназийыш кайымекыже, марий сылнымутлан кумылаҥын. Школысо воспитатель Н.А.Желонкина идалык мучко тӱрлӧ конкурс эртаралтме нерген палдарен да ушнаш таратен. Ксюшан аважат ӱдыржылан ӱшанле эҥертыш, ямдылалташ эре полша. Эше Морко район Нуж-Ключ школышто тунемше тукым изаже Игнат Гаврилов – сай пример. Рвезе марий почеламутым моткоч сылнын лудеш. Конкурслаште чӱчкыдын сеҥышыш лектеш.
– Ксюша Республикысе йоча да самырык-влаклан Валентин Колумб лӱмеш книгагудын эртарыме «Мый йӧратем родной элемым» конкурсышто мастарлыкшым терген. Василий Элмарын «Мый йӧратем родной элемым» почеламутшым лудын. Сеҥышыш лектын огыл гынат, кумылжо волен огыл. Мӧҥгешла, вес конкурслан эше сайынрак ямдылалтын. «Колумб лудмаш» оласе конкурсышто «Шӱм пӧлек» почеламут дене кокымшо верым сеҥен налын. Ынде регион-влак кокласе сылнымут фестиваль-конкурсыш каяш ямдылалтеш, – ойла аваже Татьяна Юрьевна.
Ксюшан ачажат-аважат Морко районысо Кораксола ял гыч улыт. Эсогыл ачажын шочмо пӧртшӧ Никандр Лекайнын суртшо олмышто верланен. Ӱдыр тушко чӱчкыдын коштеш. Садланат, очыни, марий шӱлышан кушкеш. Эше марий мурым мура, конференцийлашке ушнен, марий проект дене палдара да сеҥышыш лектеш. Шушаш тунемме ийыште марий ансамбльыш кошташ тӱҥалаш шона.
Христина АЛЕКСАНДРОВА.
Фотом еш архив гыч налме.
