Н.А.Заболоцкий лӱмеш 2-шо №-ан Шернур школысо «Грация» ансамблыш 5-11-ше класслаште тунемше-влак коштыт. Чылаже – 260 йоча. Нунын коклаште: Вадим Александров, Егор Смоленцев да Иван Мошкин (снимкыште). Рвезе-влак Кугу Ачамланде сарыште Сеҥымашлан 75 ий теммылан да Марий Элын 100 ияш лӱмгечыжлан пӧлеклалтше «Шочмо мландын кугу вийже» калык усталык фестивальыште мастарлыкыштым ончыктеныт. «Шучко сар кажне еҥын чоныштыжо шем палым коден. Ме, самырык-влак, коча-кована-влакын подвигыштым шарнышаш улына. Совет салтак-влаклан йӧсӧ лийын гынат, шочмо верым шарналтен, Сеҥымашым лишемденыт. Тидым ме куштымаш гоч ончыктена. Кугу таум ансамбльым вуйлатыше О.В.Васильевалан ойлена», – ойлат рвезе-влак.
