Спортсменке, чолга мотор ӱдыр. Оршанке район Кугунур школышто 11-ше классыш вончышо Настя Мухаметова (снимкыште) нерген тыге ойлаш лиеш. «Движение Первых» йоча толкынын школ пеленысе ушемын председательже, «Мотор» школ газетын тӱҥ редакторжо, «Шонанпыл» ансамбльын участницыже. Мер пашаже ятыр гынат, спортлан шуко жапым ойыра.
Куржталаш кумылан. Писылыкшым районысо да республикысе ятыр таҥасымаште терген. Тений шошым Упшо села гыч Оршанке посёлко марте лу километрым куржмыжо поснак шарнымашеш кодын. Тушто Настя шке ийготан-влак коклаште кумшо верым сеҥен налын.
Чолга ӱдыр «Вымпел» школ пеленысе волейбол команде дене пырля таҥаса. Тыгак спорт ориентирований дене районысо командын еҥже.
– Спорт иммунитетым вияҥда, чогашылым пеҥгыдемда, капкылым лывырта, чытышым, лӱддымылыкым, дисциплиным шуара. Мый шке вием тӱрлӧ могырым тергем. Мутлан, спорт ориентированийлан кӧра чодыраште илен лекташ, картым да компасым ончен, кӱлеш верыммуаш тунемынам. Тидлан пӱртӱсым эскерен моштымаш, пӱсӧ уш-акыл кӱлыт, – ойла Настя.
Ӱдыр физкультурым туныктышо Евгений Александрович Соколовлан спорт деке кумылаҥдымыжлан таушта.
Оля МАЙКОВА.
Фотом еш архив гыч налме.
