Свердловск кундем Нижнесергинский район Ялгиян ялыште илыше Аркадий ден Нелли ЕНИКЕЕВМЫТЫН вич икшывышт уло. Кокытшым ашнаш налыныт. Коло индеш ий ончыч самырык мужыр ешым чумырен. Келшен илаш да шуко икшыван лияш икте-весыштлан мутым пуэныт. Шонымашышт шукталтын.
Ача ден ава
Нелли Ильинична Ялгиян ялысе школышто йот йылмым туныкта. Марий йылмым арален кодымо верч чот тырша. Марий тӱр, кочкыш, йӱла дене палдара, йоча-влакым тӱрлӧ конкурслан ямдыла. «Урал объединяет народы» фестивальыште «Шыгле» модыш дене модмыштым Красноуфимскысе телевидений дене ончыктеныт. Марий йылмым огеш туныкто гынат, «Шочмо йылмым эн сай туныктышо» конкурсышко ушнен. Таҥасымаште тудын мастарлыкшым кӱкшын акленыт. Аркадий Петрович школысо котельныйыште тырша. Биатлоным ончаш йӧрата, пий дек шӱман. Йоча-влакым спорт деке изинек шӱмаҥден. Ача-ава ӱдыр-влакын тӱрлӧ таҥасымаште сеҥен налме чап кагазыштым, медальыштым ончен кугешнат.
– Вика ден Надям ашнаш налаш Аркадий темлен. Нунылан шуко жапым ойыра. Пырля куржталыт, футболла модыт, уроклан ямдылалташат шке полша, – ойла Нелли Ильинична.
Яна
Яна аважын корныжым тошка. Йот йылмым келгын тунемеш, шуко лудеш, марий йӱлам шымла. Тудо 27-ше №-ан Сургут оласе школын 11-ше классышкыже куснен. Москосо «Билингва» конкурсышто, марла да рушла сочиненийым возен, сеҥышыш лектын. Йот йылме дене интернет олимпиадыште икымше лийын. «Урал объединяет народы» фестивальыште мастер классым ончыктен.
Вика ден Ирина
Вика Ялгиян школын кудымшо классышкыже вончен. Тудо эре ончылно лияш тырша. Ачаж семынак пийым, пырысым йӧрата. Спорт дене кылым куча. «Российын ечыгорныжо – 2019» всероссийский таҥасыште кумшо верым налын. Районышто эртаралтше «Пеледыш пайремыште» чолгалыкшым кажне ийын ончыкта.
Эн изи ӱдырышт – Ирина – Ялгиян школын нылымше классышкыже кая. Тудын фантазийжылан мучаш уке. Сӱратлаш, открыткым ыштылаш пеш мастар. Шке ыштыме пӧлекше дене кажныштым куандара.
Маша ден Иллона
Кок кугурак ӱдырышт марлан лектыныт. Маша Сургутышто а Иллона Екатеринбургышто илат. Кугу олаште улыт гынат, марий улмышт нерген огыт мондо. Кажне гана шочмо суртышкышт куанен вашкат.
– Мемнан йӧратыме верна – кухньо. Тушко ме уло ешге чумыргена. Кочкышым мый нигунам шкетын ом ямдыле, Вика ден Ирина полшат, – ойла ава. – Пырля ыштыме кочкыш тутлырак лиеш. Ӱдыр-шамыч манникыш, шарлоткыш мом, кунам да кунар пыштышашым раш палат. Когыльым тӱрлӧ кӧрганым ыштена, ӱмбалже мотор лийже манын, сӧрастараш адак Вика ден Ирина полшат.
Еникеевмытын коронный кочкышышт – пельмень. Кочкышым уло еш дене ямдылат, кажнын – шке сомылжо. «Пельмень тӱньыкыш кӱза да унам ӱжеш. Шке ыштыме пельмень поснак перкан», – ойлат пиалан ача-ава.
