Ӱстелын озаже – мелна

 

Лумчинче,  Алкече,  Унчовий, Окавий лӱман Ӱярня кува-влак телын пытартыш кечынже Волжский район Пӧтъял школышто йоча Ӱярня пайремыште лийыныт. Тушко Морко район Унчо школысо, Коркатово лицейысе, Волжский район Кугу Корамас, Обшияр, Сотнур, Карай, Советский район Ӱшнӱр школласе тунемше-влак чумыргеныт. Шым еҥан школ команде-влак «Марий йӱла» квест-модмаште уш-акылыштым тергеныт.   Салмавондо, ече, вӱдвара дене ӱчашеныт, канатым шупшыныт, курык гыч мунчалтеныт. Ӱярня кувам калык ончылно араленыт, ӱярня мелна дене уна-влакым сийленыт.

Мелнаже-е могай гына лийын огытыт! Команмелна, Вӱргече мелна, Онар мелна, Ӱян мелна. Чурий семын сӧрастарыме, мотор тувыран, пӧрт семын оптымо да моло. Тутло мелна пуш да пайрем шӱлыш тунемше,  да уна влакын чонышкышт шошо кумылым пуртеныт.
Пайремыш толшо уна-влак: Марий Эл Республикын Кугыжаныш Погынын депутатше-влак Лариса Яковлева ден Наталья Пушкина, «Волжский муниципальный» район муниципальный образованийым вуйлатыше Владимир Сергеев, Волжский район ял шотан илемым вуйлатыше Геннадий Романов – йоча, туныктышо да ончаш толшо калыкым пайрем дене саламленыт.
«Марий йӱла» квест-модмаш: 1-ше вер –   Ӱшнӱр школ, 2-шо вер – Унчо школ, 3-шо вер – Пӧтъял школ.
«Калык модмаш»: 1-ше вер – Унчо школ, 2-шо вер –   Карай школ, 3-шо вер –  Упшер школ.
«Ӱярня кува»: 1-ше вер – Унчо школ, 2-шо вер –   Коркатово лицей, 3-шо вер –  Кугу Корамас школ.
«Ӱярня мелна»: 1-ше вер – Пӧтъял школ, 2-шо вер – Унчо школ, 3-шо вер –   Сотнур школ.
Сценарийым ямдылымаште Пӧтъял школын туныктышыжо Н.А.Самосадкина ойыртемалтын. Тудо икымше лийын. Кокмшо вер дене Унчо школын туныктышыжо Л.К.Игнатьева палемдалтын. Кумшо верыш Звенигово район Шолеҥер «Родничок» йочасадын воспитательже А.В.Матвеева лектын.