Чодырам аралымаште, экологий йодышлам рашемдымаште, самырык тукымлан ончыкылык профессийым ойырымаште школ лесничестве-влак кугу полышым пуат. Марий Эл Республикыште 63 школ лесничестве уло. Иктыже – Медведево район Шойбулак школ пелен. Тудо 1999 ийыште йоча-влакым икымше гана иквереш чумырен. Биологийым туныктышо Н.Д.Охотина икымше вуйлатыше лийын. Тыгак Пелэҥер чодыра участкын специалистше В.Е.Плотников полышкален. Кызыт школ лесничествым Т.В.Тихомирова вуйлата. Тушто паша шолеш. «Светлячок» команде кажне ийын тӱрлӧ конкурсышто да слётышто вийжым терга, чӱчкыдын сеҥышыш лектеш. Теве теният школ лесничестве-влакын регион кокласе слётыштышт эн виян команде семын палемдалтын.
Школ лесничествыш коштшо ӱдыр-рвезе-влак тӱрлӧ пашам шуктат: чодырам аралаш полшат, тунемме да шымлыме сомыллан шӱман улыт, воктен улшо еҥ-шамычлан умылтарат. Пӱртӱсым шымлаш чыла йӧн уло. Шанче пашам возымаште кугу полышым Юлтех университетын пашаеҥже-влак пуат. Тыгак Йошкар-Ола пеленысе лесничестве да Рослесинфоргын Марий Эл Республикысе филиалже дене пеҥгыде кылым кучат.
Шойбулак школ лесничестве пӱртӱсым пагалыше да арален моштышо йоча-влакым кушта. Республикысе кажне школышто тыгай паша шукталтеш гын, марий чодырана эшеат чот тӱзлана.
Фотом Йоча экологий да биологий рӱдерын архивше гыч налме.
