У ий лишемме пагытыште тӱрлӧ ӧрыктарыше кончыш лийын кертеш. Ты кечылаште йомак да тыглай илыш коклаште чек кӱчык жаплан ӱштылалтеш, юзо шӱлыш озалана. 17 декабрьыште Республикысе курчак театрыштат тыгай вийым шижаш лийын. Марий Элын тӱрлӧ районжо ден олаж гыч спорт таҥасымашлаште, конкурслаште, олимпиадылаште да тунеммаште ойыртемалтше 200 наре марий йочалан «У ий йомак» пайрем эртаралтын. Тудым Марий тӱвыра рӱдерын пашаеҥышт-влак ямдыленыт.
Лумӱдыр, Чумбылат да молат
Ты гана йоча-влаклан Шӱшкышӧ-Разбойникым «сеҥаш» кӱлын. Ты сомылышто нунылан Йӱштӧ Кугыза, Лумӱдыр, Мераҥ, Рывыж, Чумбылат ден Илья Муромец полшеныт. Ӱдыр-рвезе влак, рӱжге мурен, тӱрлӧ тӱсан йылгыжше кож йыр куштеныт да модышлаште вий-куатыштым тергеныт. Пайремым Марий тӱвыра рӱдер пеленысе «Падыраш» ден «Йоча йӱк-йӱан» ансамбль-шамыч сӧрастареныт. Марий Турек район Арбор кундем гыч семӱзгар дене шоктышо ӱдыр-рвезе-влакын выступленийышт кумылым савырен. Арслан Прохоров тӱмырым кырен, Егор Козлов гармоньым шоктен, а Валерия Кутузова – шиялтышым. Нунын туныктышышт – Г.С.Кутузов. Ӱдыр-рвезе влакым (снимкыште) пайремысе герой-шамыч коклаште ужыда.
– Герман Степанович – мыйын туныктышем да йӧратыме ачам. Туддене кугешнем, – ойла Валерия. – Марий ёлкыш икымше гана толынам, тидлан идалык мучко сайын тунемынам да тӱрлӧ конкурсышко ушненам. Пайрем моткоч келшен. Эн чот Рывыж кумылем савырен. Тудо мотор да весела.
Шере пӧлекым кучыктымеке, йоча-влаклан Республикысе курчак театрын артистше-шамыч «Конёк-горбунок» спектакльым ончыктеныт.
-
Икымше верын озаже
У ий вашеш Республикысе марий тӱвыра рӱдер «Йӱштӧ кочайлан мурем» да «У ий модыш» конкурс-влакым эртарен. Муро конкурсышто икымше верым налыныт: 6-8 ияш йоча-влак коклаште – «Подснежник» подготовительный группо (Медведево, 4-ше номеран йочасад); 9-11 ияш-влак радамыште – Анна Атьканова (Козьмодемьянск, «Дарование» школ-интернат); 12-15 ияш-влак коклаште – 1-ше номеран Шернур школ гыч трио. Модыш таҥасыштетӱрлӧ ийготан-влак коклаште икымше вер дене палемдалтыныт: Максим Вилюков (Килемар, Арде), Николай Левагин (Козьмодемьянск, 3-шо номеран школ), Арина Лобода (Национальный сымыктыш гимназий).
Катя СЕРГЕЕВА.
Авторын фотожо.
