«Марий книга издательстве» савыктыш пӧрт Марий Эл Республикын 100 ияш лӱмгечыжлан пӧлеклалтше мероприятий-влак программе почеш ятыр книгам савыкта. Шукерте огыл «Пеледалтше шошо» антологийым луктын. Савыктыш пӧртын директоржо Ю.И.СОЛОВЬЁВ дене вашлийын мутланышна.
– Чапле лӱмгечылан пӧлеклалтше книга-влакым савыктыме пашам ӱмаште тӱҥалме. Тылеч ончыч 4 антологийым лукмо: Российыште илыше тӱрлӧ калыкын сылнымут мастарыштын поэзийыштым, прозыштым марла палдарыше да марий драматург-влакын произведенийыштым рушлаш кусарыме книга-влакым савыктыме. Теве ынде йоча-влаклан келшыше антологий лектын. Тудо кок книга гыч шога. Антологийыш 34 авторын 67 мутсаскаже пурен. Книга-влак ялысе, школысо книгагудылаш миен шуыт.
– Юрий Ильич, шукерте огыл эше кок антологий ош тӱням ужын. Нунын денат палдарыза.
– Кажне антологийже кок том дене савыкталтын. «Край соловьиный» поэзий антологийыш тӱрлӧ жапысе 86 марий поэтын почеламутшым пуртымо. «Рассвет над Кокшагой» книгаште 54 марий прозаикын возымыжым, тӱҥ шотышто ойлымашым, лудаш лиеш. Лудшо еҥ кок книгаштат С.Г.Чавайн гыч тӱҥалын тачысе кече марте марий поэзий ден прозын вияҥ толмо корныштым ужын кертеш. Произведений-влакым рушлаш кусарыме.
– Шочмо кундемын лӱмгече идалыкыштыже икшыве-влакым эше мо дене куандареда?
– Йоча-влаклан пӧлеклалтше антологий радамым умбакыже шуена манаш лиеш. «Кечыйол орлаҥге» поэзий книгашке Российыште илыше тӱрлӧ калыкын сылнымут мастарыштын почеламутыштым марий йылмыш кусарен пуртымо. Тудо лишыл кечылаште савыкталтеш. Марий Элысе писатель-влакын йоча-шамычлан возымо произведенийыштым рушлаш кусарен, «Звонкая речка» кок томан книгам чумырымо. Курыкмарий кундемыште илыше йоча-влакланат сай пӧлекым ямдылена. Чуваш, тыгак финн-угор поэт, писатель-влакын сылнымутыштым курыкмарий йылмыш кусарен, йоча книгам савыкташ шонена. МАССР-ын калык писательже Геннадий Матюковскийын «Калевала» эпосшым посна книга дене савыктена. Историй поянлыкым самырык тукымлан арален кодыман.
Л.ГРИГОРЬЕВА мутланен.
