«Мый кызыт ӧрам, кузе марий поэтна да композиторна-влак наукымат ончылтен кертыныт? Тидлан вашмут икте гына лийын кертеш: калыкын историйжым, тоштыеҥ ойым пагалыме да палыме дене», – тыге ойлен шанчызе, фольклорист В.А.Акцорин. Серызына-влак ончычат, кызытат пӱсӧ ушан да уста улыт. Лач тыгай писатель-влак да тӱҥалше автор ден йоча-шамыч «Сылнымут шыже» семинар-совещанийышке погыненыт (снимкыште). Тудо 21 сентябрьыште Йошкар-Олаште Йылмым, литературым да историйым научнын шымлыше В.М.Васильев лӱмеш марий институтышто эртаралтын. Тений семинар классик Я.П.Майоров-Шкетанын шочмыжлан 125 ий теммылан пӧлеклалтын.
Сылнымут пайремым почмаште Марий Эл Республикысе тӱвыра, печать да калык-влакын пашашт шотышто министрын алмаштышыже М.И.Матвеев тыге ойлен:
– Йоча-влаклан савыкталтше марий газет ден журнал-влак Российыште ончыл радамыште улыт. Нуно са-мырык тукымым сылнымутлан шӱмаҥдымаште кугу сомылым шуктат. Ты корнышко шогалында гын, моткоч чын ыштенда. Ончыкыжым те Россий писатель ушемын Марий Элысе пӧлкажын еҥже лийын кертыда. Возымо пашада-влакым тӱрлӧ вере савыкташ йӧн уло. Возаш веле ида ӧркане.
Семинарыште йоча ден кугыеҥ-влак сылнымут саскаштым кумдан палыме серызе-шамычлан ончыктен да акым налын кертыныт. Тыге тӱрлӧ секцийыште паша шолын. Йоча-влак дене «Кече» журналын художественный редакторжо Кристина Архипова ден серызе Елена Юнусова пашам ыштеныт. Нуно шке книгашт дене палдареныт да сылнымут дене кылдалтше мастер-классым эртареныт. Йомакым возымашлан поснак кугу тӱткышым ойыреныт.
«Сылнымут шыже» семинар-совещанийын лектышыже тӱвыргӧ лиеш манын ӱшанена.
