Марий ача-аван рушла мутланыше да олаште илыше икшывым марла лудаш туныкташ лиеш! Тӱҥжӧ — тидлан тӱрлӧ йӧн дене кумылаҥден моштышо еҥ кӱлеш. Звенигово районышто илыше ӱдыр-рвезе-шамыч пиалан улыт. Ирина Чепикова (снимкыште йоча-влак коклаште) Звенигово олаште Провой кундемысе илем-влак кокласе книгагудышто «Сылнымут садвече» краеведений клубым почын.
— Мый тӱҥалтыш класслам да марий йылме ден литературым туныктышылан тунем лектынам. Кызыт вес аланыште пашам ыштем гынат, чонем садак йоча-влак да марий йылме деке шупшеш. Марла мутланыше ӱдыр-рвезе-шамычын шагалеммышт чонемым ожнысек туржеш. Самырык-влаклан кызыт тӱрлӧ погынымаш, форум але слёт эртаралтыт. А марла мутланымым шагал колына. Мый тунеммем годым почеламутым сылнын лудмо конкурслаште ятыр гана мастарлыкемым тергенам. Садлан шинчымашем ден виемлан ӱшанен, марий сылнымутлан шӱмаҥдаш, тудым чын лудаш туныкташ шонен, книгагудыш миенам. Тушто уло кумылын келшеныт, — ойла Ирина Ивановна.
Клубышко районысо тӱрлӧ ял гыч йочасадыш коштшо икшыве гыч тӱҥалын 10-шо классыште тунемше марте коштыт. Арнялан ик гана веле погынат гынат, лектыш шижалтеш. Эн ондак «ӱ», «ӧ», «ҥ» йӱк-шамычым йӧршын каласен моштен огытыл гын, кызыт раш ойлат, интонацийым, чарналтыш палым чын шындат. Ӱдыр-рвезе-влак тӱрлӧ авторын тӱрлӧ темылан возымо почеламутыштым лудыт. Туныктышышт, ийготым шотыш налын, сылнымут корнылам шке темла. Конкурсыш ушнымо годым поснак кугу тӱткышым ойырат. Клуб кӱчык жап веле пашам ышта гынат, йоча-шамыч конкурсыштат сеҥыше-влак радамыш лектыныт. Тидыже кумылыштым утыр нӧлталын!
Ирина Чепикова тунемшыже-шамычын почеламутым сылнын лудмыштым видеош войза да соцкылыш вераҥда. Ончен куанет!
— Почеламутым калык але камер ончылно сылнын лудын, йоча-шамыч шкем пеҥгыдын кучаш, лӱддымӧ лияш, вожылмаш деч кораҥаш тунемыт. Усталык дене ойыртемалтше икшыве-влакым ончен, клубыш ушнаш ятырын кумылаҥыт, шонем. «Сылнымут садвечына» рӱжгаш тӱҥалеш манын ӱшанем, — ойла Ирина Чепикова.
Христина АЛЕКСАНДРОВА.
Фотом клубын архивше гыч налме.
