Сылнымут сескем ылыжын

Волжский район Изи Корамас ялын шочшыжо Анжела Михайлован лӱмжӧ сылнымут аланыште пытартыш жапыште чӱчкыдын йоҥга. Ойлымашыже-влакым тӱрлӧ газет ден журналыште лудаш лиеш. Йоча-влаклан «Мӱян чай» книгам савыктен луктын. Ӱмаште «Ший памаш» сылнымут фондын самырык автор-влаклан эртарыме В.Абукаев-Эмгак лӱмеш конкурсышто «Ошкеча» премий дене палемдалтын. Тӱвыра, сымыктыш, сылнымут аланыште тыршыше самырык еҥ-влаклан «ВийАр» тӱвыра да келшымаш кыл мер ушем «Кеҥеж сылнымутчо-2021» литератур семинарыште икымше гана премийым кучыктен. Нунын коклаште самырык прозаик А.Михайлова лийын.

Ятыр серызе школышто тунеммыж годым возаш тўҥалын. А тый, Анжела?

– Икымше почеламутем пырыс нерген лийын. Туныктышемын мокталтен ойлымыжо чонешем ӱйым шӱралтымыла чучын, да умбакыже возаш кумылем лектын. Пырля тунемме йолташем дене ӱчашен серена ыле. Эсогыл тетрадь лаштыклам иктеш ушен, комжылан кӱжгӧ картоным келыштарен, книгам ыштенна. Тушко кажне кечын ик почеламут дене возенна. Вара ала-могай амаллан кӧра ты сомыл деч кораҥынам. Волжский район Кугу Корамас школышто марий йылмым да литературым туныктышо Галина Егоровна Ибраева сылнымут сескемым угыч ылыжтен. Шымше классыште «Юнкор» кружокыш кошташ тўҥалынам. Тачат ручка ден блокнот эре пеленем улыт.

Тый йоча-влакланат ойлымашым возет. Сюжетым кушеч налат?

– Ньоган йылмыж дене возаш оҥай, куштылго. Южгунам шкемымат йочала шижам. Кажне ойлымашем чын лийше событий манын кертам. Коклан йоча пагытемым шарналтен возем, южгунам икшывем-влакым эскерем.

Тугеже эргыч-влак ойлымашетын геройжо улыт?

– Нунын койыш-шоктышышт, кутырымышт кагаз лаштыкыш возыт. Йоча дене тудын семын мутланен, тынар оҥайым пален налаш лиеш улмаш. Икшыве-влакын кажне ошкылыштым, шомакыштым, тӱрлӧ оҥай тат-влакым кӱчык ойлымашыш савыраш лиеш. Шукерте огыл кугурак эргым книгаштем икмыняр ойлымашым лудын. «Чынак лийын мо?» – манын йодо.

Анжела, йочат годым «Ямде лий» газетыш возкаленат. Юнкор-влаклан могай тыланымашет лиеш?

– Шуко книгам лудса: рушла, марла да моло йылмыла дене. Книга уш-акылым пойдара. «Ямде лий» газет дене пеҥгыде кылым кучыза. Тек тудо тыланда ӱстел газет семын лиеш. Шочмо йылмыдам ида мондо. Шочмо йылмым йӧратыше, аклыше еҥ веле кугу кӱкшытыш шуын кертеш.

Х.АЛЕКСАНДРОВА мутланен.