Лилия ГОРДЕЕВА Волжский район Карай школым тений тунем пытарен. Чолга улмыж дене шукылан пример лийын. Руш йылме да литератур дене районысо олимпиадыште ик гана веле огыл сеҥышыш лектын. Книгам шуко лудмыжо ӱдырлан кӱкшытыш шуаш полшен.
– Мый яра жапыште пӱртӱс, янлык нерген лудаш йӧратем. Мутлан, янлык-влак нерген книгам шергалмеке, нунын илышыштым умылаш тунемат. Чингиз Айтматовын «Плаха» романжым лудмеке, пире илыш нерген ятыр шонкаленам, – ойла Лилия.
Ӱдырлан марий произведений-шамычат келшат. Тыге марий йылмыже пойдаралтеш, тӱняумылымашыже кумдаҥеш.
– Книгам лудмеке, кажне геройын койыш-шоктышыжым, пашажым аклет. Шкендым нунын дене таҥастарет. Иктаж-могай ситуацийыш логалмеке, произведенийым шарналтет да чын корным ойырымо нерген шонкалет, – ешара Лилия.
Авторын фотожо.
