Николай Сергеев (снимкыште) Морко район Коркатово лицейыште 5-ше «А» классыште тунемеш. Сылнымутлан изинек шӱман: рушла да марла почеламутым чаткан лудаш йӧрата. Рвезе-влак коклаште тыгайже шуэн вашлиялтеш.
— Почеламутым ийготлан келшышын чын ойыраш, тудым умылаш, сылнын лудаш марий йылме ден литературым туныктышо Нина Вениаминовна Аркадьева туныкта, – ойла рвезе. – Тӱрлӧ конкурсышто мастарлыкем тергем. Вес йоча-шамычым эскерем, шке усталыкем вияҥдем.
Николайын икмыняр сеҥымашыже уло. Калык-влакын икоян улмо кечыштлан да Марий Элым ыштымылан 105 ий теммылан пӧлеклалтше районысо конкурсыштат икымше верыш лектын. Николай – лицейын ӱшанже да моло-влаклан пример.
Вячеслав СМИРНОВ.
Авторын фотожо.
