Сылнымутым йӧратыше да аклыше ӱдыр-рвезе, кумдан палыме серызе да уна-шамыч 6 октябрьыште Йошкар-Олаште «Сылнымут шыже – 2021» семинар-совещанийыш погыненыт. Тудым Россий писатель ушем мер организацийын Марий Эл Республикысе пӧлкаже Марий Элысе тӱвыра, печать да калык-влакын пашашт шотышто министерстве полшымо дене эртарен. Тений тудо 45-ше гана лийын. Ты кечын ятыр тыланымаш йоҥген. Теве марий прозаик В.Н.Бердинскийын ушан ой-каҥашыже Морко район Шӱргыял школын тунемшыже-влак Настя Михайловалан, Стелла Кузнецовалан, Виктория Александровалан да марий йылме да литературым туныктышо Е.В.Григорьевалан моткоч шерге да пайдале лийын (снимкыште). Ӱдыр-влак «Марий сылнымут садвечыште» кружокышто налме шинчымашыштым семинар-совещанийыште пеҥгыдемденыт.
Тений семинар-совещанийыш ятыр йоча ушнен. Нунын коклаште мемнан юнкорна-влак Дима Веденькин, Аня Прохорова (1-ше №-ан Шернур школ), Полина Бирюкова (Йошкар-Ола, Национальный сымыктыш гимназий), Катя Григорьева (2-шо №-ан Шернур школ) лийыныт. Рушла, марла да курыкмарла возышо самырык автор-влаклан посна секций-шамыч пашам ыштеныт. Ӱдыр-рвезе-влакын пашаштым кумдан палыме серызе-влак Альберт Васильев, Эрик Петров, Сергей Щеглов, Зинаида Ермакова, Зоя Дудина, Лидия Иксанова, Игорь Попов да молат акленыт. Сай почеламут ден ойлымаш-влак «Эрвий», «Дружба» альманахлаште, «Ончыко», «Кече» журналлаште, «Ямде лий», «Кугарня» газетлаште савыкталтыт. Семинарыш ушнышо кажне еҥ таумут дене палемдалтын.
Йылмын ямжым умылен моштышо-влак тек кажне ийын ешаралтыт. Нуно, сылнымутын юзо вийжым шижын, у книга дене куандарышт.
