Марий Эл Республикысе образований да науко минис-терствын увертарымыж почеш, 2021 ий гыч Россий мучко йоча-влакым икымше классыш тунемаш налме шотышто у вашталтыш-влакым пуртымо. Тунемаш налме кампаний 1 апрельыште тӱҥалын.
Йодмашым да документым кок этап дене налыт:
1.Прописке почеш могай школ деке пеҥгыдемдалтмым шотыш налын, ача-ава-влак йодмашым да документым 30 июнь марте пуэн кертыт.
2.Школлаште вер кодеш гын, пропискым ончыде, 6 июль гыч 5 сентябрь марте документым пуаш лиеш.
Йодмашым да документым пуымо икмыняр йӧн:
- Госуслуго (gosuslugi.ru) гоч.
- Марий Эл Республикын тунемме услуго-влак портал гоч.
- Школын электрон почтыжо гоч.
- Заказной серыш дене колташ але школышко шке намиен пуаш лиеш.
Тунемаш налме кампаний нерген кӱлеш уверым кажне школын сайтыштыже муаш лиеш.
