14-20 июльышто Йошкар-Олаште Финн-угор йоча да самырык-влакын тӱнямбал слётышт эртаралтын. Тушко Марий Эл, Карелий, Татарстан, Удмурт, Коми, Мордовий республикла, Ленинград, Моско, Пермь, Виче кундемла да Хант-Манси автоном округ гыч 100 утла участник ушнен.
Россий калык-влакын икоян улмо идалыкыште Финн-угор йоча да са мырык-влакын тӱнямбал слётышт 30 ияш лӱмгечыжым пайремлен.
– Мый 2005 ийыште слётыш икымше гана участник семын ушненам ыле. Ынде лу ий лужавуй сомылым шуктем. Кызыт икшывем-влак слётын участникше улыт, – ойла Медведево район Мамьярсола гыч Ольга Киселёва. – Слётышто ӱдыр-рвезе-влак шке тӱвыраштым, калыкыштым эшеат чот аклаш тунемыт. Шочмо кундемышкышт пӧртылмеке, ты пагалымашым шкешт гай самырык-шамыч коклаште шарат, молымат калык деке лишкырак лияш кумылаҥдат. Ты слёт гыч йоча-шамыч келге шинчымашан каят. Тидыже моткоч шерге.
Эр гыч кас марте весела
Ӱдыр-рвезе-влак Финн-угроведений университетыште тӱрлӧ велым вияҥыныт. «Финно-угры – кто мы?», «Учимся жить в мире и согласии», «Народное творчество», «Финно-угорские танцы» уроклаште уш-акылыштым пойдареныт, мутланеныт, тунемыныт. Йоча-влаклан мастерской-шамычат моткоч келшеныт. Тушто тӱрленыт, курчакым ямдыленыт, шер, кумыж гыч тӱрлӧ арверым ыштеныт, уам тодыныт, куымо паша дене палыме лийыныт. Кажныже чонлан лишыл аланым ойырен.
Кажне калыкын – шке кечыже
Кече-влак ойыртемалтшын эртеныт. Кажне делегацийлан шкекалык тӱвыраж дене палдараш йӧн лийын. Мутлан, 16 июльышто Карел Республик да Ленинград кундем гыч толшо-влак чылаштым «hyviä huondestu» манын помыжалтареныт. Ты шомак карел йылме гыч «поро эр» манын кусаралтеш. Ленинград кундем Вистинский ял шотан илем гыч «Мать-песня» («Laulu Emä teatteri tööpertti») театр мастерскойын уста коллективше ижор калык куштымаш, муро, фольклор дене палдарен, спектакльым модын, мультфильмым ончыктен. Ты деле гацийым Дмитрий Харакка-Зайцев вуйлатен.
Софья Кунакбаева, Татарстан Республик Кукмара район Уял гыч:
– Слётыш мемнан делегацийым Почкучукский школышто марий йылмым да литературым туныктышо Ирина Вячеславовна Родыгина конден. Пеш йывыртенам. Икымше кечынак лужаште икте-весе дене таҥлалтынна, Марий Эл гыч Маша дене вашкылым писын муынна. Ончыкыжымат келшаш тӱҥалына манын ӱшанем. Калык мастар Виталий Кудрявцевын вуйлатыме уа воштырым тодмо мастерскойжо келшен. Шкешотан кӱмыжым ыштенам. Тудо киндым, емыжым аралаш йӧнан. Шокшо атым шындашат келшен толеш. Финн-угроведений университетат пайдалын эртаралтын. Чудь калык нерген келгынрак пален налаш оҥай ыле.
Рӱдола келшен
Слётын участникше-влак Какшан эҥер сер ӱмбалне верланыше И.С.Палантай лӱмеш тӱвыра да сы мыктыш колледжын Националь ный сымыктыш гимназийыштыже иленыт. Марий Эл Республикын рӱдолажын сылнылыкшым кажне кечын тӧрза гыч эскереныт, экскур сий дене коштыныт.
– Йошкар-Ола пеш мотор. Венецийым ушештара. Черке ятыр, куполышт моткоч торашке волгалтеш. Ик кечын визымше отряд дене экскурсий дене М.Шкетан лӱмеш театр деке, Оболенский-Ноготков лӱмеш площадьышке миенна. Йошкин пырысын чапажым ниялтен, пылышышкыже шонымашнам йышт пелештенна. Шукталтеш маныт. Ола мучко шым пырысиге скульптурым тӱрлӧ вере вераҥдыме оҥайын чучеш. Нуным кычалын коштын, олам шымлаш йӧнан. Тышке уэш пӧртылмӧ шуэш, – манеш Хант-Манси автоном округ Белоярский ола гыч толшо Сандра Ирган.
Финн-угор йоча да самырык-влакын тӱнямбал слётышто калык-влак кокласе келшымаш, умылымаш вияҥыт. Икшыве-шамыч, икте-весе дене пеҥгыде кылым ыштен, родо калыкын тӱвыражым пален кушкыт. Тек умбакыжат тыгак лиеш.
Оля МАЙКОВА.
Авторын фотожо.
