Элыштына частичный мобилизацийым увертарымеке, изам-влак, сержант Денис Вячеславович Никитин ден Сергей Михайлович Иванов, тыныс илышым аралаш каеныт. Нуным Ульяновск олаште туныктеныт. Мый «Иваныч» позывноян Сергей изам нерген каласкалынем. Чаманен каласаш логалеш, тудо, Шочмо элым аралышыжла, курымешлан вуйжым пыштен.
Йолташыже-шамыч изамым порын шарнат. Тудо шкенжым патыр сарзе семын ончыктен. Ӱшанен кучыктымо МТ-12 «Рапира» саргурал-пушкым сайын шымлен. Икмыняр жап гыч Сергейым «Чебурашка» посна штурмовой батальоныш кусареныт. Изам туштат лӱддымылыкым ончыктен. Йолташыже-влак тыге ойлат: «Тудын пелен лияш – чап. Тушман дене тӱкнымӧ годым садак сеҥена манын ӱшан эре лийын. Шинчаштыже лӱдмаш шижалтын огыл». Урожайное села дек лишемме годым кассетный боеприпас дене лӱйкалаш тӱҥалыныт. Сергей лӱдын огыл. Эсогыл батальон штабын начальникшым «ужар кумдыкыш» лукташ полшен. Но контрнаступлений годым Кужэҥер кундемын патыр эргыже семын колен.
Сергей Михайловичым, колымекше, Патырлык орден дене палемденыт. Ме тудын дене моткоч кугешнена да шарнаш тӱҥалына. Пырля служитлыше йолташыже-влак кызытат возат. Ача-аваж дек уналат толыт.
Сергей Иванов Шочмо элже, ешыже верч илышыжым пуэн. Кажне рвезе тыгай лийшаш!
Всеволод КУЗНЕЦОВ.
Кужэҥер, Шӱдымарий.
Фотом еш архив гыч налме.
