Сар. Могай кочо, чоным тургыжландарыше, шинчавӱдым йоктарыше шучко шомак. Кеч-мо гай сар шуко еҥым тулыкеш кода, мучашдыме ойгым конда. Кугу Ачамланде сарыште Сеҥымашлан 80 ий эртен гынат, талешкына-шамычым эре шарнена.
Кугезе кочам Александр Захарович Загайнов Роҥго район (кызыт Советский) Шудысола ялеш шочын. 1942 ий 10 апрельыште Шочмо элым аралаш каен. 1944 ий июльышто нелын сусырген да кум тылзе наре эм лалтын. Вара уэш сӧй пасушко вашкен.
Кредалмаште патырлыкым ончыктымыжлан Йошкар Шӱдыр орденым, «За боевые заслуги», «За взятие Кенигсберга», «За победу над Германией» медаль-шамычым кучыктеныт. Мӧҥгыжӧ 1946 ий 1 мартыште веле пӧртылын. Вуйлатыме сомылым шуктен, ветеринар врач лийын. 1977 ийыште тале йӱр годым тудым паша верыштыжак волгенче перен. Мый кочам дене кугешнем да таум ойлем.
Юлия ЯГОДАРОВА.
Советский, Кельмаксола.
