Ӱдыр-рвезе-влак, школыштыда шыже ончер эрта, очыни. Те, тӱрлӧ пакчасаскам икте-весышт дене ушен, пӱчкеден, янлыкым, кайыкым але арверым ыштеда. Тендам саска ден пакчасаскам моторын пӱчкедыме сымыктыш дене палдарена. Тиде сымыктыш карвинг маналтеш. Тидын нерген Йошкар-Ола гыч тӱнямбал мастар Т.Н.МАЛЯВИНА (снимкыште) дене мутланышна.
– Татьяна Николаевна, карвинг кундемыштына кумдан шарлен огыл, мастар-влакат уке гаяк улыт. Тидын нерген кузе пален налында?
– Кевытыште коштшемла, «Украшение блюд. Цветы из овощей» книга шинчашкем пернен. Моторлыкым ужмем нерген йолташем-влаклан калас-каленам. Икмыняр жап гыч мыланем тиде книгам пӧлекленыт. Лудын, ончен, пакчасаскам пӱчкедаш тыршенам. Интернетыште видеоролик ден мастер-класс-влакым онченам. Вара Таиландыш тунемаш каенам.
– Моторлыкым шочыкташ могай пакчасаска але фрукт утларак келшен толыт?
– Кеч-могай пакчасаскам але фруктым кучылташ лиеш, но кажныже кужу жап огеш аралалт. Мутлан, олмам пӱчмеке, тудо нарынчемеш. Мыланем арбуз дене пашам ышташ моткоч келша. Ошо, йошкарге да ужар тӱс-влак улмылан кӧра тушеч кеч-могай эмблемым, пеледышым пӱчкын лукташ лиеш, эсогыл портретым. Тыгак дайкон, реве гыч пӱчкедаш сай.
– Ямде арвер кужу жап аралалтше манын, мом ыштыман?
– Свежа пакчасаска ден фруктым кучылтман. Арверда ынже кошко манын, йӱштӧ вӱдым чӱчкыдынрак шыжыктыман. Кешыр, ушмен, дайкон, кочушмен гыч поделкым йӱштӧ вӱдыштӧ аралыман. Кажне кечын вӱдым вашталтет да холодильникышке шындет гын, нуно арня наре мотор шоген кертыт. Кавун эн шуко жап аралалтеш. Тудым кажне кечын йӱштӧ вӱдыштӧ 30-60 минут шинчыктет гын, уэш «самырыкештеш».
– Мотор сӱрет-влакым пӱчкедаш кӱзым кучылтман. Йочалан лӱдыкшӧ огыл?
– Моткоч тӱткӧ лийман. Йоча-влак пакчасаска ден фруктым кугыеҥ деч посна пӱчкедышаш огытыл. Пӱсӧ кӱзым гына кучылтман. Кид ден кӱзӧ вурго кукшо лийшаш улыт.
