«Ямде лий» газетын чолга юнкоржо-влак шукерте веле огыл парт коклаште шинчат да арня еда серышыштым редакцийыш колтат ыле. Таче марий тӱняште сайын палыме улыт. Нунын кокла гыч иктыже – К.Быкова. Кристина Марий кугыжаныш университетыште марий йылмым, литературым да англичан йылмым туныктышылан тунемеш. Тыгак «МЭТР» телеканалыште корреспондентлан пашам ышта. Ӱдыр дене шинчаваш мутланышна.
– Кристина, тый пеш чолга улат. Школышто тунеммет годымат эре ончылно лийынат, очыни.
– 1-4-ше класслаште Старсела школышто тунемынам, вара Коҥганур школышко кусненам. Тӱрлӧ мероприятийыш, конкурсыш, олимпиадыш эреак ушнаш тыршенам да сеҥышыш лектынам. Почеламутым сылнын лудмо конкурслашке эн шуко коштынам, очыни.
– Ала уста поэт-влакын возымыштым лудын сераш кумылаҥынат?
– Мый поэзий книга-шамычым изинек лудаш йӧратенам. Кугурак шӱкалтышым, мутат уке, школышто туныктышо-влак ыштеныт. Тыгак «Ямде лий» газетыште савыкталтше почеламут-шамыч сераш шулдыраҥденыт. Икымше почеламутем кумшо классыште тунеммем годым шочын. Тудо Марий Эл нерген лийын да йоча газетеш савыкталтын.
– Чолган возкалыметлан 2014 ийыште «Марий юнкор» слётышко усталыкетым вияҥдаш ӱжыныт.
– Тӱрлӧ кундем гыч погынышо юнкор-влак дене Йошкар-Олаште ик арня мастарлыкнам таптенна. Лужавуйна Вера Горохова лийын. Поэт, прозаик, журналист-шамыч дене вашлиймаш шинчымашым келгемдаш полшен да утларак сераш таратен. Тунамсе юнкор-влак дене ятыр ий кылым кученна, кызытат тӱрлӧ соцкылыште вашла возкалена. Шарналташ гын, тиде Олеся Васеева, Наташа Буркова, Егор Фёдоров, Максим Юзыкбаев, Наташа Алексеева. Чылалан шокшо саламым колтем. Тыгак йӧратыме «Ямде лий» газетлан кугу илыш корныш лекташ полшымыжлан кугу таум ойлем.
– Кристина, тый кызытат почеламутым возет. Пашатат усталык шӱлышан. Илышыштет лектышым, сеҥымашым тыланем.
