Мыйын шочмо Кугу Пӱнчер ял гыч 51 пӧръеҥ Кугу Ачамланде сарыш каен, нунын кокла гыч 29 еҥ веле мӧҥгӧ пӧртылын. Пошкудо Актун ялыште Ачамланде сарын участникше-влаклан обелиск уло. Тушко, ял калык дене погынен, родым, палымым да пошкудо-шамычым шарналташ кажне ийын лектына. Обелискыште Кугу Пӱнчер ялын эргыжын, ачамын чӱчӱжын, Иван Васильевич Таныгинын, лӱмжым ужаш лиеш. Тудо Сталинград кредалмашын участникше лийын, старший сержант званий дене мӧҥгӧ пӧртылын. Шуко наградыже уло. Иван Васильевичлан Йошкар Шӱдыр орденже да «За оборону Сталинграда» медальже поснак шергакан лийыныт.
Мыйын шонымаште, кызытсе жапыште эн тӱҥ – сарын шучкылыкшо, герой калык нерген шарнымашым арален кодымаш. Кажне еҥ мемнан эрык верч вуйжым пыштыше талешкылан тауштен илышаш.
Кирилл НОВОСЁЛОВ.
Шернур, Кукнур.
