«Икшыве – ача-аван воштончышыжо», – маныт калыкыште. Йоча-влак кугыеҥым ончен тунемыт. Поро пашам ыштет гын, нунат ты корным тошкат. Спорт дене кылым кучет – пеленет куржталаш, ече дене мунчалташ вашкат. Шернур посёлко гыч Шкалинмыт ешыште кажне эрдене зарядкым ыштат. Радам дене шогалын, чыланат капкылым тарватат. Изижат-кугужат вараш огыт код. Ава икшыве-влаклан кугу примерым ончыкта.
Спортышко корно
Озавате Анна Николаевна Шернур район Йошкар-Памаш ялеш шочын-кушкын. Марисола школышто тунеммыж годым спорт дене кылым кучаш тӱҥалын. Туризм дене районысо, республикысе, российысе таҥасымашлашке ушнен да сеҥышыш лектын. Аваже тӱҥалтыш класслам туныктен, садлан ӱдыр туныктышто лияш шонен. Школым тунем пытарымеке, Оршанке педколледжыш физкультур дене туныктышылан тунемаш пурен. Вара менеджер профессийым налын. Тидын годымак Шернур посёлкысо спорт школышто пашам ышташ тӱҥалын, завуч лийын. Вуйлатыше марте кушкын. Кызыт тиде тӧнеж Шернур посёлкысо физкультур да спорт рӱдер маналтеш. Анна Николаевна тыште волейбол да баскетбол дене секцийлам вӱда. Тудо эргыже-влаклан спортышко корным почын.
Изижат вараш ок код
Кугурак эргышт, Максим, 2-шо номеран Шернур школын индешымше классшым чыла «визытанлан» тунем пытарен. Спорт дене пеҥгыде кылым куча. ГТО нормативым шӧртньӧ значоклан сдатлен. Ече дене изи годсек талын мунчалта. Икымше кугыеҥ разрядше уло. Грамотшым, медальжым шотлен от пытаре! Ече дене Рошто кас республикысе таҥасымаште кумшо верыш лектын. 9 Майлан пӧлеклалтше «Сеҥымаш корно» республикысе таҥасымаште кокымшо лийын. Тений физкультур дене республикысе олимпиадыште районын чапшым арален. Волонтёр пашам яра жапыште шукта.
Матвей визымше классышке вончен. Изаж семынак «визытанлан» веле тунемеш. Ече дене талын коштеш да эрыкан кучедалмаш дене пеҥгыде кылым куча. Кучедалаш тренерже В.В.Дудоров туныкта. Сеҥымашыжат уло: Талешке кечылан пӧлеклалтше районысо открытый турнирыште – кумшо вер.
Кум ияш Марианна йочасадышке коштеш. Изаже-влакым ончен тунемеш. Нунын дене пырля тӱрлӧ упражненийым ышта. Вараш ынеж код. Аваж дене пырля пашашке коштеш. Изинек спортлан шӱман кушкеш.
Спорт дене кылым кучышо таза ача-аван икшывыштат таза. Спортын вийже кугу.
Пӱртӱс лоҥгаште
Суртоза Станислав Витальевич пашаште ятыр жапым эртара. Чыве фабрикыште электриклан тырша. Озаватат пашаште «шолеш». Каныш кечылаштат яра жап уке: таҥасымашке кудалыштыт. Кеҥежым, отпуск годым, веле еш дене пырля каналташ йӧн уло.
– Кеҥежым пӱртӱс лоҥгаште, эҥер серыште, жапым эртараш йӧратена. Тений Медведево посёлкысо зоопаркышке миенна. Йоча-влаклан янлык-шамычын илышыштым эскераш келшен. Коча-кова дек унала коштына. Ялыште южшак весе, шӱлашат куштылго, – ойлат вате-марий.
Таза ача-ава – таза йоча
