Школышто икымше классыш тунемаш толшо йоча-влак дене тӱрлӧ проблеме лектеш. Тидын шотышто Советский район Вечын школын директоржо А.Ю.Мусина тыгерак ойла:
– Кызыт икшыве-шамыч яндар южышто модын куржталме олмеш шукыж годым телефоным кучен шинчын жапым эртарат. Нунылан спорт дене кылым кучыман, капкылым пеҥгыдемдыман. Йочан вуйдорыкшым тӱрлӧ модыш полшымо дене вияҥдаш йӧнан. Тидыже икшывым сайын кутыраш, шонкалаш туныкта. Южо тунемше возымыж годым ручкам сайын кучен огеш мошто але вашкӱзӧ дене кагазым пӱчмӧ годымат нелылык лектеш. Кидварням лывырташ сӱретлыме, ненчыме, аппликацийым ыштыме занятий-влак пайдале улыт. Икшывылан вуйым пудыратылше модыш нимынярат уто огеш лий. Кид лывыргылыкым йодшо да уш-акылым пеҥгыдемдыше чыла паша кӱлешан.
Ача-ава-шамыч йочам психологически ямдылышаш улыт. Куд ият пелаш южо тунемшын идалыкысе пагыт, кече, еш нергенат умылымашыже шагалрак. Вургемым писын чияш, йолчиемыште шнурокым сайын кылдаш икшыве йочасадыштак тунем шушаш.
Йӧратыза икшывыдам. Шочшыдан тазалыкше верч азапланыза да шинчымашым налаш кумылаҥден моштыза.
З.ТИМОФЕЕВА.
И.РЕЧКИНЫН фотожо.
