«Кече, юж, вӱд – мемнан поро йолташна», – тыге ойлат Йошкар-Оласе 80-ше номеран йочасадышке коштшо икшыве-влак. Кажне кече оҥай мероприятийлан поян. Теве шукерте огыл «Весела старт» йоча-шамычым куандарыш. Тушто кок команде вийжым тергыш. Весела кумыл, келшымаш, шокшо кеҥеж кече чоным вӱчкышт. Физкультурым туныктышо Ольга Викторовна оҥай заданий-влакым ямдылен. Кажне йыжыҥ писылыкым, чулымлыкым, моштымашым йодын. Кок командыжат мастарлыкым ончыктен. Тыгай сынан мероприятий кушкын толшо тукымым шуарымаште пеш кӱлешан. Тазалыкым пеҥгыдемдаш полша.
Надежда ГОДУНОВА.
Фотом йочасадын архивше гыч налме.
