У Торъял район Чӱксола книгагудо пелен «Изи артист-влак» клуб пашам ышта. Тудым книгагудо вуйлатыше Л.И.СОКОЛОВА вӱда.
– Людмила Ивановна, клуб кунамсек пашам ышта?
– 2016 ийыште Оксана Михайловна Глушкова клубым почын. 2017 ий гыч тудым мый вуйлатем. Ончыч клубыш кугыеҥ-влак погыненыт гын, кызыт йочасадышке коштшо да 1-7-ше класслаште тунемше ӱдыр-рвезе-влакым (снимкыште) чумырена.
– Шкешотан «театрын» тӱҥ сомылжо могай?
– Йоча-влакым библиотекыш кошташ да книгам лудаш кумылаҥдыме шонымаш дене пашам ыштена. ™дыр-рвезе-влакым сценыште шкем кучаш туныктена. Марий але руш йомакым ойырымеке але сценарийым шке возымеке, йоча-влак дене тӱшкан лудына. Роль-влакым шеледена. Вара кажне шомакым раш да чын ойлаш тунемына. Мый вожылшырак йочалан кугурак рольым пуаш тыршем, тыге тудо чолгарак лиеш. Спектакльым ямдылымеке, пош-кудо ялласе йочасадлашке лектына. Клубышко коштшо кугурак ийготан-влак изирак-шамычым кушташ туныктат.
– Пашашкыда вашталтышым пурташ шонеда?
– Мый юнкор кружокым почаш шонем. Кызыт йоча-влак ямде йомакым лудыт гын, ончыкыжым нуным шке гыч возаш кумылаҥдынем. Тӱҥалтыште ямде йомакым кызытсе илышлан келыштарен возыкташ лиеш. Тиде пашалан тунем шумекышт, нуно шке серен кертыт.
