Телым кол кузе ила?

 

Редакцийыш Морко район гыч серыш пурен: «Мый визымше классыште тунемам. Колым эҥыраш йӧратем. Кеҥежым кажне кечын ер воктеке кошташ ямде улам.  Телым ий ӱмбак шуэнрак лектам. Колжат кеҥежымсе деч начарын чӱҥга. Палаш оҥай, телым кол кузе ила? Миша М.»

Нине йодыш-влаклан вашмутым пален налаш Шернур район Марисола ялыште илыше тале колызо, поэтессе, Марий Эл Республикын сулло туныктышыжо,   З.В.Ермакова деке йыҥгыртышым.

Чыла гаяк колын кап температуржо вӱдысӧ температур дене икгаяк. Изирак ерыште але пӱяште вӱд пундаш марте кылма гын, кол-влак йошкыныш малаш возыт. Тыге карака, ротан да моло кол телым илен лектеш. Кугурак ерыште илыше кол-шамыч келгышкырак волат, да лакым муын, тӱшка дене илат. Нунылан телым илен лекташ кеҥежым погымо витаминышт полша. Лач шужымышт годым, лаке гыч лектын, кочкышым кычалыт. Сандене телым кол кажне кечын огеш чӱҥгӧ. Кызыт, мутлан, малыме жапышт. Февраль кыдалне але март тӱҥалтыште олаҥге, шереҥге, кырыш-влак утларак тарванылаш тӱҥалыт.  Олаҥге йӱштым йӧрата, шереҥге – луман игечым, кырыш гын кеч-могай кечынат эҥырыш логалын кертеш, – умылтара Зинаида Васильевна.

– Те нуным мо дене кучеда? Йоча-шамычлан колым могай кочкыш дене сийлаш темледа? – пален налнем шкежат.

Кугурак колым кучаш манын, ондалчык ший колым (блеснам) кучылтыт. Мый утларакше йошкар тӱсан изи шукшым – кармын муныжым – кучылтам. Колым тӱрлӧ пучымыш дене сийлаш лиеш, –  ойла тале колызо.