Марий тӱвыра рӱдер 2015 ий гыч «Йоча Ӱярня» республикысе пайремыш ӱдыр-рвезе-влакым чумыра. Тений тудо Медведево районысо Пӱкшерме ялын у тӱвыра пӧртыштыжӧ эртаралтын.
Пайремышке ныл команде ушнен: Йошкар-Ола гыч «Падыраш», Морко район Волаксола школ гыч «Ӱдыр кумыл», Медведево район Шойбулак школ гыч «Мелнашке-влак», Параньга район Кугу Пумарий школ гыч «Самырык тукым». Нуно кум конкурсышто усталыкыштым ончыктеныт. Пайремым «Ӱярня мелна» конкурс дене почыныт. Команде-влак жюрим команмелна, пареҥге мелна дене сийленыт, а Волаксола гыч команде мӧр ден пӧчыж мелна дене ӧрыктарен.
Могай пайрем муро деч посна? Вес конкурсышто ӱдыр-рвезе-шамыч ончылно моткоч неле задаче шоген: шеледен пуымо мутым кучылтын, кӱчык жапыште такмакым шонаш. Тыште Кугу Пумарий школын «Самырык тукым» (снимкыште) командыже ойыртемалтын.
– Командыште кажныже мастар: икте мура, весе кушта, кумшо семӱзгарым шокта. Школышто перемен жапыште гармонь да тӱмыр дене шоктымо мастарлыкнам эреак вияҥдена. «Йоча Ӱярня» пайремыштат усталыкнам ончыктышна, – ойлат тӱмырзӧ Ранис Хаметов ден гармоньчо Егор Мосолов.
«Ӱярня кува» дене палдарымаш уремысе сценыште эртаралтын. Туштак йоча-влак тӱрлӧ модышышто чулымлыкыштым тергеныт. Пайремым иктешлен, эн чолга команде семын «Самырык тукымым» саламленыт. «Йоча Ӱярням» мучашлен, ӱдыр-рвезе-влак, оҥгыш шогалын, мурен-куштен, теле дене чеверласеныт.
Катя СЕРГЕЕВА.
Авторын фотожо.
