Еш – илышын негызше. Тудо йӧратымаш, умылымаш, пагалымаш дене шочеш. Тичмаш еш ласкалык да куан дене темеш. Тыгай ешыште кугыеҥжат, йочажат пиалан лиеш. Кажне икшыве ача-аван йӧратымашыштым шижын кушкеш гын, тудын ончыкылыкшо волгыдо лиеш.
Башкортостан Республик Калтаса район Павасола ялыште илыше Дина Валентиновна ден Алексей Фидарисович Гараевмыт латкум ий ончыч ешым чумыреныт. Кум икшывышт уло (снимкыште). Ешыште келшен да икте-весым пагален илымашым тӱҥлан шотлат.
– Ача – суртышто оза, ава – порылыкым, ласкалыкым кучышо суксо. Нуно икте-весылан эҥертен, ик ойыш шуын илат гын, ешыште порылык эре озаланаш тӱҥалеш, – Дина Валентиновна тыгай шомакла дене ешыж нерген каласкалаш тӱҥале. Тудо Павасола школын вуйлатышыже, физкультур урокым вӱда. Пелашыже Алексей Фидарисович школышто ачалыме пашам шукта.
– Ме коктынат школышто пашам ыштена. Кажне ик-шывын койыш-шоктышыжым пален, кӧлан полыш кидым шуялташ кӱлмым шижына. Йочалан йолташ, ойым пуэн, колыштын моштышо ака але иза семын лияш тыршена. Сандене мемнан кум икшыве огыл, шукырак улыт манам гынат, йоҥылыш ом лий, шонем, – шыргыжын ойла суртоза.
Ача-ава марий калыкын тӱвыраже, йӱлаж дене ик-шывышт-влакым изинек палдарат, кидпашалан шӱмаҥдат.
Кугурак ӱдырышт – Инесса ден Илесса – йыгыр улыт. Тӱжвал тӱсышт дене икгай койыт гынат, шонымашышт тӱрлӧ.
– Кидыште парнят икгай огыл. Инесса чолгарак гын, Илесса ласка. Туге гынат, ик шонымашыш писын шуыт, – ойла самырык ава.
Ӱдыр-влак Павасола школын кудымшо классыштыже тунемыт. Школысо да райо-нысо конкурслаште мастарлыкыштым ончыктат. Биологий, физкультур предметла дене олимпиадыште уш-акылыштым да чолгалыкыштым тергат. Ялысе клуб пеленысе «Сюрприз» ансамбльын чолга участникышт улыт.
– Мураш, кушташ чылан йӧратена. Кажне пайремым, йӱлам шуктен, сылне сем почеш эртарена. Пела-шемын ачаже – тале гармоньчо. Изам Роман Тимиршинович Мусагитов – мурызо. Усталык шӱлыш ешыштына эре озалана, – ойла Дина Валентиновна.
Мирослав ты школын кокымшо классыштыже тунемеш. Ачаже пелен чыла пашалан кумылаҥеш. Суртозан кидше шӧртньӧ. Пӧртым, мончам шке шонымыж семын чоҥен. Эргыж дене коктын шулдыран йолташ-влаклан шырчык омартам кажне ийын ыштат. Кызыт тушко кайык-влак илаш пуреныт.
– Шочмо кундемын сӧрал верлажым ончен кошташ, пӱртӱсыштӧ канаш келша. Эҥер воктене лияш йӧратена. Мирослав ден Алексей колым кучаш кумылан улыт (снимкыште). Яндар южышто шолтымо кол шӱр деч тамле нимо уке. Тыште чон кана, вий ешаралтеш, – ойла Дина Валентиновна.
Гараевмыт спортлан шӱман улыт. Куштылго атлетике дене марафоныш кажне ийын ушнат. Сеҥыше радамыш лектыт.
– Йоча-влак мемнан эҥертышна, ончыкылыкна улыт. Нунын шинчаончалтышышт куан дене темеш – мемнан чонна юарла. Сеҥымашыш шуыт – пырля йывыртена. Ме кум пачаш пиалан улына, – ойлат вате-марий.
