8-10 декабрьыште Марий тиште кечылан пӧлеклалтше ятыр мероприятий эртаралтын. 9 декабрь поснак тӱвыргӧ лийын. М.Шкетан лӱмеш Марий национальный драме театрыште сӱретче М.Клюкинан «Марий йомак тӱня» ончерже, «Калык – Марий Элын поянлыкше» фотовыставке пашам ыштеныт. «Марий ӱдырамаш кугу сарын тулыштыжо» фотоальманахын, Л.Яндаковын «Сар кыша» книгажын презентацийышт лийын. Марий йылмым, литературым туныктышо, тӱвыра, шанче пашаеҥ-влак марий тиштын ончыкылыкшо, марий туныктымо книга нерген кутыреныт. Сылнымутым да марий семым йӧратыше-влак шке почеламутыштым лудыныт, мурыштым йоҥгалтареныт. Уш-акыл тергыше «Мунло» марафон теният ятыр командым поген. «Марий Элын идалыкысе книгаже-2020» конкурсышто «Йоча-влаклан эн сай книга» таҥасыште С.Григорьева-Сотын (снимкыште) «Сова с фонарём и жёлтые ушки» книгаже ойыртемалтын.
Идалыкын эн сай книгажлан МарНИИЯЛИ-н ямдылыме «История Марий Эл с древнейших времен до наших дней» кок томан книгам шотлымо.
Х.АЛЕКСАНДРОВА ямдылен.
