❔ Карелийыш каяш шонышо еҥлан могай верым ончалаш темледа?
Мария Ремшуева, Петрозаводск ола гыч гид-экскурсовод:
— Карелийын йӱдвел пӱртӱсшӧ ойыртемалтше. Тыште тӱжем дене ер, эҥер, кугу чодыра, мотор деч мотор вӱдшуҥгалтыш, курыкоҥ улыт. Тыгодым шып-тымык озалана. Кижи, Валаам, Соловецкий отролаш, «Рускеала» курыкан паркыш, Кивач вӱдшуҥгалтышыш миен толаш темлем. Гирвас палеовулкан шагал палыме. Но тышке толшо кажне еҥ ты сылне верым нигунам ок мондо. Тушто кок-кум миллиард ий ончычсо кӱэмалтше тул лапашым ужаш лиеш. Унала вучена!
❔ Карелийыште могай пайрем, фестиваль эртаралтыт?
Наталья Денисова, «Матура» калык вургем клубын вуйлатышыже:
Шукерте огыл «Крууга» флешмоб Петрозаводск олаште да республикысе тӱрлӧ районышто шуко калыкым чумырыш. Тудо тӱнямбалысе тӱп калык-влакын тӱнямбал кечыштлан пӧлеклалтын. Крууга — тиде йыр пӧрдын куштымо карел калык куштымаш. Тыгак тений Калык вургем фестивальым икымше гана эртареныт. Тудо йӱлаш пура манын шонем. Калык усталык да тӱвыра инициативе рӱдер «Карелия поёт» тӱнямбал муро пайремым эртара. «Кижи» тоштер-заповедникын фестивальже-влак кажне гана оҥай, ойыртемалтше улыт: «Кижская регата», «Арт-переправа», «Кижи-Арт. Остров притяжения» да молат. Тыгак Кижский ремесленный форумым палемдаш лиеш. Сортавала олаште калитке карел кочкышлан пӧлеклалтше фестиваль эртаралтеш, «Бастион» паркыште — «Карельская земля» историй реконструкций фестиваль. Карел йылме дене шагалын мутланат. Садлан шуко пайремым рушла вӱдаш логалеш.
❔ «Кипиня» йоча сылнымут журнал моло савыктыш деч мо дене ойыртемалтеш?
«Кипиня» йоча сылнымут журналын тӱҥ редакторжо Яна Филимонкова:
— Журналыште материал-влак карел йылме дене веле огыл, тыгак вепс, финн йыл мыла дене савыкталтыт. Кажне йылме дене идалыкыште ныл гана номер лектеш. Карел номерым 850 наре еҥ лудеш. Журналым 5-8-ше класслаште тунемше-влак уроклаште ешартыш материал семын кучылтыт. Шкеат возкалаш тыршат. Ача-ава, туныктышо-шамыч кугу эҥертыш улыт. Ӱдыр-рвезе-влак ешышт, йолташышт, школыш, тӱрлӧ вере миен коштмышт, пийышт, пырысышт да моло ныл йолан йолташышт, оҥай пайремыште лиймышт нерген возкалат. Сымыктыш школыш, студийыш коштшо-шамыч мыланна мотор сӱретыштым колтат. Пашаштым икымше лаштыкыш чӱчкыдын вераҥдена. Икшыве-влак уштодыш-шамычлан вашмутым кычалаш кумылан улыт. Редакций дене тӱрлӧ конкурсым увертараш тыршена: «Спорт — это здоровье», «Мой любимый рецепт», «История моей семьи» да молымат. Соцкыллаште «Почитаем «Кипиня» акцийым эртарена. Журнал вияҥеш, возышо, лудшо-влак гына шуко лийышт.
Христина АЛЕКСАНДРОВА ямдылен.
