«Кугезе вож» республикысе фестиваль 19 февральыште Оршанке посёлкышто эртаралтын. Тушко йоча да самырык-влакын фольклор коллективышт, театр студийышт чумыргеныт. Волжский, Курыкмарий, Звенигово, Кужэҥер, Марий Турек, Медведево, Морко, У Торъял, Шернур, Советский, Оршанке районла гыч тунемше-влак толыныт.
Советский район Кужмара селасе клуб пелен улшо «Кугезе вож» йоча фольклор ансамбльыш коштшо ӱдыр-рвезе-влак эн изи ийготан лийыныт. Нуно «Фольклор минут» миниатюрым ончыктеныт. Ньога-влак сценыште ош лыве гай чӱчкеныт, муреныт, куштеныт, йомакым каласкаленыт.
– Ансамбльын тиде составшым кодшо ийын чумырымо. «Эр ӱжара» фольклор ансамбльыш коштшо артист-влакын икшывышт улыт, – ойла вуйлатыше В.Н.Ефремова. – Пайрем йӱла, койыш-шоктыш нерген йоча-влак ачашт-авашт деч пален налыт. Пырля репетициыйыш коштыныт, изирак сценкылаште модыныт. Мый сценарийым ямдылем, рольым шеледен, сценыште шкем кузе кучаш туныктем. Йоча-влак кушташ, мураш моткоч йӧратат. Тидлан нуным М.В.Назарова кумылаҥда.
Участник-влакын пашаштым жюри икмыняр номинацийыште аклен: «Эн сай сценарий», «Эн сай возымо паша» (реферат), «Сценыште ончыктымо эн сай программе», «Фольклор произведенийым эн сайын лудын ончыктышо».
Звенигово район Нуктыж тӱвыра пєрт пеленысе «Куткыеш» драмкружокыш коштшо Марина Макарова кружок вуйлатыше Е.А.Юнусова (тудо кован рольым модын) илыш йӱла дене кылдалтше ужашым ончыктеныт. «Йылмым йодмаш йӱла», маналтеш.
– Мутланен моштыдымо йочалан вӱд воктеке йылмым йодаш миенна. Икшыве чынжымак кутыраш тӱҥалын», – ойла Елена Андреяновна.
У Торъял районысо Элембай ял клуб пелен клубышто «Живая старина» йоча фольклор ансамбль шукертак пашам ышта. Вуйлатышыже – Т.Н.Мосунова. Ӱдыр-рвезе-влак Шернур посёлкышто эртаралтше «Волшебный сундучок» фестивальыште кок ий почела сеҥыше лийыныт. «Кугезе вож» фестивальыште мастарлыкыштым кажне ийын ончыктат. Тений «По Ивашке и рубашка» театрализованный модмаш дене калык ончыко лектыныт. Руш калык коклаште чўчкыдын вашлиялтше Ваня нерген ятыр калыкмутым, мыскарам ойленыт.
Морко район Шордӱр школын тунемшыже Илона Александрова «Имне кӱтымаште калык модыш, йомак да миф» рефератым арален.
– Туныктышем, Н.Л.Кудряшова, калык йӱла, модыш нерген шуко каласкален. Ожнысо илыш нерген пален налаш моткоч оҥай. Мый шуко книгам лудынам, коча-кова-влак деч йодыштынам. Пален налмемым рефератыш чумыренам, – ойла Илона.
Йоча-влак тыгай темылан рефератым араленыт:
«Суртводыж» еш йӱла – Евгений Пакеев (Шернур, Койсола).
«Тувыртыш пайрем» – Даниил Светлаков (Кужеҥер, Тошто Йӱледӱр).
«Лӱмым пуэдыме йӱла: Русьышто да таче» – Ксения Клюкина (У Торъял, Элембай).
«Петро пазар Йӱледӱр кундемыште» – Александр Новосёлов (Кужеҥер, Тошто Йӱледӱр).
«Суртвольык – марийын илышыштыже» – Владислав Васильев (Морко, Изнур).
«Куркылык кью» (ӧртым кораҥдымаш) – Айнур Хамидуллин (Морко, Тат-Чодыраял).
«Ожнысо илемын кумалме верже» – «Шоҥго тумо» – легенде – Кристина Никитина (У Торъял, Кугу Нурмо).
«Йӧратымаш да ӱчым шуктымаш» – Нырс ерын легендыже – Айрат Хамидуллин (Морко, Петровский).
«Кечыла вўргече» пайрем йӱла – Анна Горохова (Кужеҥер, Йывансола).
«Шовырым кудалтен модмаш» илыш йӱла – Ариана Оразаева (Морко, Унчо).
«Чакмарий» музыкально-хоровой ансамбль нерген – Алина Николаева ден Вера Малышкина (Звенигово, Чакмарий).
«Когаргыше мелна» – Даниил Савинцев (У Торъял школ).
