Самырык-влак кажне кечын чийыме вургемыштышт марий тӱрым кучылташ огыт вожыл. Кызытсе пагытлан келыштарыме калык сӧрастарышымат чӱчкыдын пижыктат. Теве Татарстан Республик Агрыз районысо Кадрек ял гыч Екатерина Ишманова телефоныш але вес келшыше арверыш пижыкташ йӧрышӧ стикер-влакым ямдыла.
— Шкешотан наклейке-влак гоч мый марий улмем дене палдарем, калыкемын тӱвыра моторлыкшым ончыктем. Марий тамгам сӱретлыме годым тукымем дене кылым шижам. Планшетыш сӱретлыме кагазыш «войзымо» деч ойыртемалтеш. Ончыч нелын чучын. Икмыняр приложенийым шымлен, шкаланем келшышым муынам. Ынде паша куштылгынрак кая.
Стикерым савыкташ Анастасия акам полша. Ме икте-весылан ӱшанле эҥертыш улына. Тудлан кӧра пашам нерген калык пален налын. Акам нуным ужалымашкат луктын. Шкеже «Марий вургем» брендым виктара. Футболко ден сӧрастарыш-шамычым ямдыла, — палдарыш ӱдыр.
Оля МАЙКОВА.
Фотом еш архив гыч налме.
