Теле каникул годым Башкортостан Республикысе Бирск олаште «Совёнок-2022» республикысе шанче-практике конференций онлайн эртаралтын. «Шочмо йылме» секцийыште Октябрьский оласе 8-ше номеран школын 7-ше классыштыже тунемше Полина МИНЬКАЕВА чолгалыкшым ончыктен. Тудо «Марий калык пайрем-влак» проектым арален. Шаран кундемысе пайремлам сайын палымыжлан, ешартыш йодыш-влаклан чын вашмутым пуымыжлан Полиналан Гран-прим кучыктеныт. Чолга ӱдырым тӱҥалтыш класслам туныктышо Р.А.Султангареева ямдылен.
Марий ӱдырын дневникыштыже – чыла «визытан». Музыкальный школышто баян дене шокташ тунемеш. Ӱмаште Уфа олаште эртаралтше «Культурное наследие» всероссийский конкурсын республикысе йыжыҥыштыже 2-шо верыш лектын.
