Ӱмаште Р.А.Богомолован лӱмжӧ радио, телевидений дене чӱчкыдын йоҥгыш, газетлаштат ятыр возышна. 3-шо номеран Советский школышто марий йылмым да ИКН-ым туныктышо «Марий йылмым эн сайын туныктышо-2022» республикысе конкурсышто сеҥен. Марий Элын чапшым «Лучший учитель родного языка и родной литературы» российысе конкурсышто арален. Тудын дене лишкырак палыме лийна.
– Роза Александровна, всероссийский конкурсышто мо дене ӧрыктаренда?
– Мый марий талешке-влак нерген кугешнен каласкаленам. «Шондыкысо тоштер» йӧн дене палдаренам. Тиде шкешотан изи экскурсий. Кажне арверым ужаш, кучаш, южыжым чиенат ончаш лиеш. Тыге йоча-шамыч мут-влакым писынрак шарнен кодыт. Моло туныктышо-шамычлан тиде йӧн пеш келшен.
– Марий йылме дек кумылаҥдаш могай у йӧным кучылтыда?
– Ӱдыр-рвезе-влак у шӱлышан, кызытсе илышлан келшыше йӧным пеш йӧратат. Икана ик йоча йодеш: «Марий калыкын рэпше уло мо? Те мурен ончыктен кертыда?» «Марий калык пеш уста. Мом ужмыжым, колмыжым почеламут корнылашке пыштен мошта», – манын вашештышым да, ямдылалтде, рэпым лудаш тӱҥальым. Моло оҥай йӧн-влакымат кучылтам.
– Тунемше веле огыл, туныктышат тунемшаш. Те шинчымашдам кузе келгемдеда?
– Ме йоча-влаклан шинчымашым пуэна. Нунат мемнам туныктат. Тунемше-влак дене «Писатели и поэты Марийского края и Великобритании» сетевой проектым ямдыленна. Йоча-влак серызе-шамычын илыш корныштым шымленыт, произведенийыштым шергалыныт. Таҥастарымеке, чоныштышт кугешнымаш кумыл ылыжын. Тыгодым сетевой проект дене пашам ышташ, интернетым кӱлеш семын кучылт мошташ пырля тунемынна. Мастарлыкнам тӱрлӧ конкурсышто ончыктена.
– Туныктымо пашаште девизда уло?
– Йочам умылен моштыман, тудын шинчаж дене ончыман. Икшыве могай, тугайым йӧратыман да пагалыман.
– Педагогын да наставникын идалыкше деч мом вучеда?
– Туныктышо-влак могырыш мелын савырнат да нунылан кугурак тӱткышым ойыраш тӱҥалыт манын ӱшанем.
