Туныктышо йочалан кумда шинчымаш тӱняш омсам почеш. Шотлаш, возаш да лудаш веле огыл, а сай ден осалым ойыраш, пӱртӱсым йӧраташ, кугуракым пагалаш да изиракым чаманаш туныкта. Кажне туныктышын лӱмжым историеш шӧртньӧ буква дене возен кодыман. Нуно эн кӱлешан, пайдале сомылым шуктат, кажне еҥлан илыш корныш шогалаш полшат.
Марий Турек район Карлыган кыдалаш школышто 3-шо классыште шинчымашым погышо икшыве-влак шке туныктышыштым, Розалия Евгеньевна Гавриловам (снимкыште), ӱшанле эҥертыш, поро йолташ да кокымшо ава семын ужыт.
– Ты профессий деке изиэм годымак шӱмаҥынам. Икымше туныктышем, Светлана Александровна Ермаковам, кугешнен онченам. Тудын гаяк тале педагог лияш шоненам, – ойла самырык туныктышо.
Самырык-влакым туныктымо пашаште кызыт шуэн вашлият. Розалия Гаврилова икымше ошкылым ыштыме деч ондак сайжым-удажым вискален, нелылыкым сеҥен кертмыжым шижын. Йӧратыме сомылжым кокымшо ий шукта.
– Йоча-влак койыш-шоктыш могырымат, тазалык, уш-акыл писылык денат тӱрлӧ улыт. Тидым ончылгоч умылыман. Пашаште йодыш лектеш гын, кугу опытан туныктышо деч ойкаҥашым йодаш ӧрман огыл, – ойла Розалия Евгеньевна.
Шергакан туныктышо-влак, профессионал пайремда дене шокшын саламлена. Пиалым, пашаштыда кугу лектышым да сай тунемше-шамычым тыланена.
Оля МАЙКОВА.
Фотом школ архив гыч налме.
