Звенигово район Поянсола школышто поэзий шӱлышан туныктышо Л.А.Васильева пашам ышта. Сылнымутым йӧратымыжым ӱдыр-рвезе-влакын чонышкышт шыҥдара. Школышто «Мыйын шочмо верем» кружок уло. Тушто 1-2-шо класслаште тунемше-влак мастарлыкыштым таптат. Нунын коклаште эн чолгаже-влак – Валерия СУВОРОВА ден Вадим ЛЕБЕДЕВ.
– Шылташ нимом, ялысе йоча-влакат рушла кутыраш тыршат. Марий йылмым йӧраташ, тудын акшым да вийжым шижаш сылнымут полша. Кружокышто изи ойлымашым, йомакым, почеламутым возаш тунемына. Верысе поэт-влакын сылнымутыштым шергалына, наизусть тунемына. Марий калыкын ойпогыжо, эртыме корныж дене палыме лийына, – ойла Лидия Аркадьевна.
Ӱдыр-рвезе-влак мастарлыкыштым тергаш тӱрлӧ конкурсышко ушнат. «Моя марийская земля» почеламутым сылнын лудмо республикысе конкурсышто ойыртемалтыныт. Валерия «Сылнымут алмаштыш» республикысе конкурсышто ойлымашыж дене сеҥышыш лектын, Вадим по-челамутшо дене кокымшо лийын.
– Ме «Ямде лий» газетым да «Кече-Солнышко» журналым лудаш йӧратена. Тушто шке таҥаш ӱдыр-рвезе-влакын возымыштым куанен шергалына. Меат нунын семын сайын возаш тӱҥалына манын шонена. Туныктышына гай уста лийнена, – ойлат Валерия ден Вадим.
