«Тый Михаил, а мый Миша улам»

Советский районысо Ӧрша школын 2-шо классшым тунем пытарыше Миша Петров «Душа России» республикысе калык усталык йоча фестивальыште «Мультимедийное творчество» направлений дене «Фотоэссе» номинацийыште 2-шо вер дене палемдалтын. Тудын эссежым савыктена.

«Тый Михаил, а мый Миша улам», – лач тыге, очыни, кугезе кочамым Михаил Яковлевич Виногоровым ужмеке ойлем ыле. Тудын лӱмжым мыланем пуэныт. Кочам пеҥгыдын йодшо, чыным йӧратыше, поро кумылан лийын. Кугу Ачамланде сар годым ятыр шучко сӱретым ужын.

М.Я.Виногоров Советский районысо Рушъялыште 1905 ийыште шочын. 1941 ийыште фронтыш каен. Сар пытымешке, стрелково-лыжный батальонышто кредалын. Ятыр гана сусырген. Пытартыш сусыржо эн неле лийын. Тылеч вара пурла кидше пашам ыштымым чарнен.

Тудын нерген тетла нимат огына пале. Кочам изиракше годым ачаж деч сар нерген йодыштын. Но эре икгай вашмут йоҥген: «Йєсє лийын. Эргым, тидын нерген тыланет палаш ондак. Тендам шучко чын дене лӱдыктылаш огыл кредалынна. Те у илыш дене илышаш улыда!»

Кугезе кочам 1989 ийыште илыш дене чеверласен. Авам 7 ияш лийын гынат, кӱртньӧ коробкаште кочажын наградыже-влакым аралымыжым сайын шарнен кодын. Изирак уныкажлан эре ойлен: «Тиде коробкаште Пиалым аралем. Пиаллан верч тушман дене кредалаш пернен».

Кочай, тый мемнан шӱмыштына улат. Мый тыйын лӱметым нумалам гын, икшывем да уныкам-влаклан тыйын нерген каласкалаш тӱҥалам. Тыйын лӱмет – Кугу Ачамланде сарын геройжо-влаклан пӧлеклалтше Ӱшнӱр селаште верланыше  обелискыште. Мый тый денет кугешнем.