Кугу Ачамланде сарыште тушманым сеҥымылан 80 ий гынат, ме, самырык тукым, тыныс илышым арален кодышо-шамычым мондышаш огынал. Кугезе кочам Георгий Ефимович Ягодаров нерген утларак пален налаш манын, ковам Елизавета Васильевна Ягодарова-Орлова деч йодыштынам. Еш архивым, шымлыме паша-влакым радамленам. Кугезе кочам Марий Турек районысо Марий Купто ялеш туныктышо ешеш 1904 ий 2 майыште шочын. Тудо педагогический курсым тунем пытарен. Комсомол ячейкым вуйлатен, туныктышо лийын. 1942 ийыште Шочмо элым аралаш каен. 1945 ий марте кредалын. Сар деч вара Чехословакийым тӱзаташ полшен. Георгий Ефимович ятыр медаль, I степенян Кугу Ачамланде сар орден дене палемдалтын.
Шочмо кундемыш пӧртылмеке, Марий Купто школышто туныктышылан пашам ыштен, 1949-1951 ийлаште директор лийын. Кугезе кочамын ӱмыржӧ 1989 ий 13 июньышто кӱрылтын. Ме тудым кугешнен шарнена.
2024 ийыште Моско олаште «Дорога памяти – 1418 шагов к Победе» тоштер комплексыште лийынам. Спискыште кугезе кочамын лӱмжым муынам. Георгий Ефимович – ешнан, элнан геройжо!
Даша АЛЕКСЕЕВА.
Волжский, Пӧтъял.
Фотом еш архив гыч налме.
