Йоча-влакын йӱлышӧ шинчаштым ужаш мыланна эн шерге. Сандене ме, газет редакцийын пашаеҥже-влак, школлашке лектын, вашлиймашым эртарашак тыршена. Шукерте огыл Медведево районысо У Арбан школышто уна лийынна.
Ты тунемме тӧнеж 1959 ий гыч пашам ышта. Кызыт тушто 400 утла йоча тунемеш. Икшыве-шамыч, ӧрдыжкӧ кайыде, тыштак музыкальный да художественный мастарлыкыштым вияҥдат. Ятыр кружок да спорт секций капкылым шуараш, уш-акылым пойдараш полшат. Школым М.В.Козырева 18 ий моштен вуйлата. Шке пашаштым аклыше туныктышо-влак кӱкшӧ сеҥымашке шуыт. Нунын кокла гыч иктыже – Л.А.Яндыганова. Тудо 4-ше «А» классым туныкта. Школысо тоштерым вуйлата. Пеш чолга да чулым марий ӱдырамаш. Школ тургым деч канен, марий тувырым урга да тӱр дене сӧрастара, марий курчак-шамычым ышта. Людмила Аркадьевнан тунемшыже-шамычат писе да ум пален налаш тыршыше улыт. 28 ӱдыр-рвезе гыч куд икшыве чыла «5»-лан тунемеш. Роман Смирновым поснак палемден кодыман. Вашлиймашым эртарыме годымат рвезе келге шинчымашан улмыжым ончыктен. Классыште марла сайын кутырышо йоча уке гынат, «Ямде лий» газет нерген тӱткын колыштыныт. Конкурслашке чолган ушненыт. Нунылан изирак пӧлекым кучыктенна. Ӱдыр-рвезе-влак газет редакцийышке сӱретыштым, кӱчык заметкыштым колташ кумылаҥыныт. Вашкылна пеҥгыдемеш манын ӱшанена. У Арбанысе у тукым йоча газетлан у сыным пурташ полша манын шонена.
Меат пӧлек деч посна кодын огынал. Л.А.Яндыганова ден библиотекарь Г.Ю.Соколова школ тоштерыште экскурсийым эртареныт. Поян тоштерым ужаш – пиал да куан. Тау тыланда!
Авторын фотожо-влак.
