Марий Элыште «Не Иван, или Как приручить Богатыря» фильмым войзеныт. Фильмыште подростко-влакын проблемышт, йоча да ача-ава кокласе кыл, икымше йӧратымаш, шочмо калыкын тӱвыраже дене кылдалтше йодыш-влакым тарватеныт.
Йошкар-Оласе Бауман, М.В.Ломоносов лӱмеш лицейлаште, 2-шо ден 7-ше номеран да моло школлаште тунемше-влак, М.Шкетан лӱмеш Марий национальный драме театрын артистше-шамыч камер ончылно мастарлыкыштым ончыктеныт. Онарын рольжым Россий да голливуд актёр Олег Тактаров модын, Йываным – Йошкар-Оласе М.В.Ломоносов лӱмеш лицейын 7-ше классшым тунем пытарыше Дима Иванов (снимкыште).Режиссёр – Шернур кундемын эргыже Денис Шаблий.
– Киношто икымше гана войзалтынам. Мый камер ончылно шкем кучаш, эмоциемым ончыкташ тунемынам. Сценысе кучедалмаш эн чот келшен. Икымше ролем артист корным ойыраш кумылым утыр ылыжтен, – ойла рвезе.
