Россий писатель ушемын Марий Элысе пӧлкаже 86 ий пашам ышта. Тӱҥалтыште тудын радамышке С.Чавайн, М.Шкетан, Н.Игнатьев, Ш.Осып, О.Ипай да молат ушненыт. Тиде жапыште ятыр вашталтыш лийын. Ушемын тачысе пашаже нерген вуйлатыше С.Д.АРХИПОВА дене мутланышна.
– Пытартыш жапыште могай йоча книга-влак савыкталт лектыныт?
– Ӱмаште ятыр йоча книга ош тӱням ужын. Яков Егоровын «Кочамын пӧлекше», Аркадий Богдановын «Кузе маска вуйлатен?», Леон Раян «Сокыртага», «Марий калык модыш-влак», Раисия Кольцован «Мераҥын шочмо кечыже» книга-влак савыкталт лектыныт. Йоча-влакын возымо йомакышт «Кузе рывыж мераҥым ондален?» тӱшка сборникыш пуреныт. Самырык автор-влакын сылнымут пашаштым кажне ийын «Эрвий» альманахыште лудаш лиеш.
– Светлана Дмитриевна, тений могай писатель-влакын юбилейышт лиеш? Тудым кузе пайремлаш шонеда?
– Поэтессе-влак Зинаида Ермакова ден Мардан Раялан 75 ий темеш, Зоя Висвис ден Лидия Иксановалан – 55 ий. Марий Элын калык писательже Ипполит Лобанов 70 ийым темен. Виталий Шкалин тиде ийготышкак тошкалын. Константин Ситников 50 ияш юбилейжым пайремла. Шыжым руш серызе Алексей Краснопёровын 100 ияш лӱмгечыжым палемдаш тӱҥалына. Самырык возкалыше-влаклан «Сылнымут шыже» республикысе семинар-совещаний тудын лӱмжӧ дене эртаралтеш. Пошкырт кундемыште Регион-влак кокласе сылнымут семинар Яныш Ялкайнын 115 ияш лӱмгечыжлан пӧлеклалтеш. А республикыште эртаралтше сылнымут конкурс Дмитрий Орайын шочмыжлан 120 ий темме лўмеш лиеш. Тӱнямбалне улшо ситуацийлан кӧра юбилей-влакым кузе пайремлыме шотышто кызыт каласаш йӧсӧ.
– Самырык тукымым сылнымут деке шӱмаҥдаш манын, могай пашам шуктеда?
– Марий Эл Республикысе тӱвыра, печать да калык-влакын пашашт шотышто министерствын полшымыж дене 2011 ий гыч Республиканский молодежный сылнымут конкурсым да вес кундемлаште илыше марий йоча-влаклан сылнымут семинарым эртарена. Пошкырт кундем Мишкан селаште ий коден сылнымут конкурсым увертарена. Тушко шкежат миен коштына. Ӱдыр-рвезе-шамычын возымыштым республикысе изданийлаште да «Эрвий» альманахыште савыктена. Ий гыч ийыш у лӱм-влак лектыт.
Снимкыште: С.АРХИПОВА поэтессе, Параньга район Кугу Пумарий школын туныктышыжо Т.ЛАПИНА да юнкорна Максим ЛАПИН дене пырля.
