Йошкар-Оласе Бауман лицей пелен теният 10-шо медиаклассым чумыреныт. Палемден кодена: ончыкылык журналист-влакым ямдылыме шонымаш дене ӱмаште ты лицейыште тыгай классым икымше гана почыныт. Тений 10-шо классыште 23 икшыве тунемеш: 5 рвезе да 18 ӱдыр. Теорий шинчымашым налме дене пырля нуно «Марий Эл» увер агентствыште практикым эрташ тӱҥалыт. Эртыше арняште Печать пӧртыштӧ уна лийыныт. «Ямде лий» газет редакций денат палдаренна.
Ӱдыр-рвезе-влак чолга, илыш дене тӧр ошкылшо улыт. Нунын коклаште марий йылмым палыше тунемше шинчымашым пога. Тиде Юлиана Курочкина (снимкыште: шола гыч икымше). Тудо Параньга район Матародо школышто 9-ше классым тунем пытарен.
«Мыланем медиаклассыште шинчымашым погаш келша. Чылажат оҥай, у. Йолташ-влак икоян, икте-весылан полшаш ямде улыт. Старостына Даша Смирнова мемнам ушен мошта. Бауман лицей – шкешотан тунемме полат. Йӧршеш ойыртемалтше, чапле. Йоча-шамычлан келге шинчымашым налаш чыла йӧн уло», – ойла Юлиана.
Икшыве-влак тунемме дене пырля ятыр проектым илышыш шыҥдараш тӱҥалыт. Нунын пашашт дене ончыкыжымат палдарена.
Людмила ГРИГОРЬЕВА.
Авторын фотожо.
