М.Шкетан лӱмеш Марий национальный драме театр калык ончыко у пашам лукташ ямдылалтеш. 5-6 февральыште У.Шекспирын пьесыж почеш «Торешвате» спектакльым ончыкта. 12 ияш деч кугурак ийготан еҥ-влаклан темлалтеш. – Тӱнямбал драматургын произведенийжым калык поэт Семён Николаев марлаҥден. Пьесыште тореш йылман Катаринан Петруччо дворянинлан марлан лекмыже да нунын кокласе кыл нерген ойлалтеш. Шекспир тӱрлӧ койыш-шоктышан образым почаш йӧным пуа. Ончаш толшым спектакль мучаште шонаш таратыше монолог вуча, – ойла спектакльын режиссёржо Р.Алексеев.
