М.Шкетан лӱмеш Марий национальный драме театр 104-ше тургымым 6 октябрьыште тӱҥалеш. У.Шекспирын «Гамлет» пьесыж да Ф.Гладковын «Цемент» романже почеш шындыме «Гамлет. Машина. Цемент» спектакль-кином калык ончыко луктеш. Режиссёр – С.В.Пектеев.
– Мемнан Гамлетна – марий рвезе. Моско олаште кӱшыл шинчымашым налме да йотэлыште лийме деч вара тудо шочмо кундемышкыже пӧртылеш. Шекспир тусо жаплан келшыше еҥын койыш-шоктышыжым почын пуэн гын, ме, у йӧным кучылтын, тачысе кечылан келыштаренна. Шонаш таратыше, келге шонымашан спектакль-кином рушла субтитр улмылан кӧра умылаш куштылгырак лиеш, шонем, – ойла Степан Пектеев.
Театрыш кошташ йӧратыше-влакым у тургымышто ятыр премьер вуча. Мутлан, «Китай кува», «Посадить дерево», «Алладин» да моло.
