У тургым – у спектакль

Республикысе курчак театр 80-ше юбилейный тургымым «Гуси-лебеди» спектакль дене почын. Режиссёр – Санкт-Петербург гыч А.Я.Стависский.

– Йоча-влаклан спектакльым шуэн шындем. «Гуси-лебеди» йомакын моральже, шонымашыже чылалан палыме. Ӱдыр-рвезе-шамыч умылышт, нунылан ончаш куштылго лийже манын тыршенам, – ойла режиссёр.

Александр Янович У ий пайремлан «Серебряное копытце» спектакльым шында.

Курчак театр молгунамсе семынак калык ончыко ятыр у спектакльым лукташ палемден.

– Шуко у постановкым руш калык йомак почеш шындена. Тыгак немыч йомакзе Вильгельм Гауфын «Карлик Нос» йомакшын премьерже лиеш. Тудо руш калык йомак деч мистике сынан улмыж дене ойыртемалтеш. «Коза-дереза», «Умка» спектакль-влакым да моло йомакым ончаш темлена, – палдара театрын режиссёржо Е.А.Насупа. – Октябрыште Свердловск кундем гыч Краснотурьинский курчак театр «Кугу гастроль-влак» программе дене толшаш. Тудо «Малыш и Карлсон», «Мойдодыр» да «Огневушка» спектакльлам  ончыкта. Ме Чуваш курчак театрын эртарыме «Карусель сказок» фестивальыш каяш ямдылалтына.