Звенигово район Поянсола тӱҥалтыш школыш Поянсола, Нурӱмбал, Нурдамучаш ялла гыч 34 ӱдыр-рвезе коштеш. Школ пеленысе йочасадыш 44 ньога кажне кечын вашка. Кок па-чашан кугу школышто йоча-влаклан тунемаш чыла йӧн уло. Пашаче коллективым да тунемше-влакым И.В.Морозова вуйлата. 1-ше ден 4-ше класслам Л.А.Васильева туныкта. Кок классыште – 16 йоча.
– Шочмо марий йылмынам арален кодымо верч ме чылан тыршена. Школышто мероприятийлам лач марла эртарена. Тыште рушла кутырышо йочат марла мутланаш тунемеш. Тӱрлӧ конкурсыш ушнена. «Мыйын Марий мландем» республикысе конкурс йӱлаш пурен. Тений тудым кумшо гана эртаренна. Йоча-влак сӱрет, фотографий, возымо паша-шамыч дене таҥасымашке ушнат, – ойла Лидия Аркадьевна.
Ӱдыр-рвезе-влак яра жапыштым «Ямде лий» газет дене пырля эртарат, урокышто кучылтыт. Марла йоча газетым 24 тунемше налеш.
Икымше классыште тунемше Валерия Суворова газет гоч тӱрлӧ уверым пален налеш, конкурслаш ушна. Вадим Лебедевлан кроссворд ден чайнвордым ышташ келша. А Ирина Танаваева сӱретлаш йӧрата, сандене шымше ден кандашымше лаштыклам эн ончыч шергалеш. Нуным снимкыште ужыда.
