30 январьыште Марий кугыжаныш университетыште шочмо марий йылме, марий литератур, кугыжаныш марий йылме, ИКН предметла дене республикысе олимпиаде эртаралтын. 9-11-ше класслаште тунемше 103 ӱдыр-рвезе уш-акылжым трген. Нуным Марий Эл Республикысе образований да науко министр Л.А.Ревуцкая, Марий кугыжаныш университетын ректоржо М.Н.Швецов саламленыт да сеҥымашым тыланеныт. «Тиде олимпиаде поснак ойыртемалтше. Тудо шочмо марий йылмым да марий кундемыште илыше калык-влакын тӱвыраштым аралаш кумылаҥда. Ешыште, калык коклаште йылмым вияҥден колташ полша. Ме республикыштына шочмо йылме вияҥже манын тӱрлӧ йӧным кучылтына», – ойлен Лариса Анатольевна.
Шочмо марий йылме дене сеҥышыш лектыныт: 9-ше класс – Е.Семёнова (Йошкар-Ола, Национальный сымыктыш гимназий); 10-шо класс – О.Степанова (Морко, Унчо); 11-ше класс – А.Саматаева (Курык Марий, Эмін).
Марий кугыжаныш йылме дене: А.Королева (У Торъял школ, 9-ше кл.), Н.Алексеев (2-шо номеран Морко школ, 10-шо кл.), Д.Веденькин (1-ше номеран Шернур школ, 11-ше кл.).
Марий литератур дене Йошкар-Оласе Национальный сымыктыш гимназийын 9-ше классыштыже тунемше П.Бирюкова, Шернур район Марисола школын 10-шо классыштыже тунемше Д.Ешеева да Морко район Унчо школын тунемшыже Д.Кириллов келге шинчымашым ончыктеныт да сеҥыше радамыш лектыныт.
Звенигово район Чакмарий школ гыч А.Харченко (9-ше кл.), Шуко профилян интернат гыч М.Макматова (10-шо кл.) да Козьмодемьянск оласе «Дарование» лицей гыч А.Кисельникова (11-ше кл.) ИКН дене сеҥымашке шуыныт.
Республикыште сеҥыше-влак 17 февральыште регион-влак кокласе олимпиадыште шинчымашыштым заочно тергаш тӱҥалыт.
Сеҥыше-влак коклаште «Ямде лий» газетын чолга юнкоржо-влакат улыт. Саламлена!
