Агрокласслаште тунемше-влак тӱрлӧ сынан конкурсышто уш-акылыштым, мастарлыкыштым терген кертыт. Иктыже – АгроНТРИ-2026» всероссийский конкурс. Тушко лач ялысе агроклассыште тунемше ӱдыр-рвезе-шамыч ушнат. Шукерте огыл Марий кугыжаныш университет пелен ты конкурсын регионысо йыжыҥжым иктешленыт. «АгроСмарт», «АгроБио» да «АгроКоптеры» таҥас-влак лийыныт. Йоча-шамыч шинчымашыштым практикыште тергеныт.«АгроБио» номинацийыште Амина Мухаметова (Марий Турек школ), Яна Тимофеева (Волжский, Пӧтъял) да Камиля Мухаммадеева (Марий Турек, Мариец) сеҥышыш лектыныт. Нуным снимкыште ужыда. Ӱдыр-влак «Создание цифровой карты плодородия почв Петъяльского округа для устойчивого развития агросектора» теме дене пашам ыштат. Вуйлатышышт – Пӧтъял школышто химийым туныктышо М.Ю.Тимофеева, кураторышт – технический науко кандидат, доцент Н.О.Бурова. Ӱдыр-шамыч Пӧтъял кундемысе мландым тӱрлӧ велым шымленыт. Кушто могай ӱяҥдыш кӱлмым але уто улмым рашемденыт. Каҥашышт кӱлешан да пайдале. Нуно ончыкыжым «Умная почва Республики Марий Эл» мобильный приложенийым ышташ шонат. Сеҥыше-влак конкурсын российысе йыжыҥжылан кызыт ямдылалтыт. Тек шонымашышт шукталтеш!
Людмила ГРИГОРЬЕВА.
Марина Тимофееван фотожо.
