Советский район Вечын селан ӱдыржӧ, ПГТУ-н студенткыже Екатерина Юркина «Добровольцы России» всероссийский конкурсын регионысо йыжыҥыштыже «Малая Родина» таҥасыште «Ушан чарналтыш (остановко)» проектше дене сеҥышыш лектын.
– «Детский форсайт» всероссийский конкурсын форумыштыжо шочмо ялым тӱзатыме нерген проектым возаш таратеныт. Командыште кумытын лийынна. Ме шочмо кундемыште остановко-влакым сӧрастараш кумылаҥынна. Но тыглай дене огыл, а йоча-влаклан пайдам кондышо сӱрет дене. Проектым Советский районышто илышыш шыҥдарена. Йоча-влак школ автобус дене кудалыштыт. Чиялтыдыме але рӱдаҥше остановкышто тудым вучат. Проектна шочмо кундемлан у тӱсым пурташ полша манын ӱшанена, – ойла Екатерина.
Кажне чарналтыш посна предметлан пӧлеклалтын. Кажнылан тӱсым, персонажым, дизайным шоненыт. Тушан правил-влакым возат. Теве Колянур ялысе остановко марий йылмысе падеж-влак дене палдара.
Вес районысо волонтёр-влак дене ончыкыжым палыме лияш да проектымм вес кундемлаштат илышыш шыҥдараш шонат.
